ခရမ်းပြာရဲ့ မျိုးဆက် Gen Z သမီးလတ်ရေးတဲ့ ဗိုလ်ချုပ်မွေးနေ့ အတွက် ကဗျာ...

 ခရမ်းပြာရဲ့ မျိုးဆက် Gen Z သမီးလတ်ရေးတဲ့ ဗိုလ်ချုပ်မွေးနေ့ အတွက် ကဗျာ...

ဗိုလ်ချုပ်ရေ..

မွေးနေ့မှာပျော်ရွှင်ပါစေလို့ပြောရင်

မျက်နှာပြောင်တိုက်ရာကျမလား..

ကိုယ်တည်ခဲ့တဲ့တပ်က

ကိုယ့်သမီးကိုပြန်သိမ်းတဲ့အဖြစ်

ဗိုလ်ချုပ်ရင်မှာ စူးနင့်နေမှာပေါ့..

ငါက ဒီကျည်ဆယ့်သုံးချက်ကိုလေ

တိုင်းပြည်ကိုကယ်ဖို့

ပြည်သူတွေအတွက် အပစ်ခံခဲ့တာကွလို့

တိုင်းပြည်ကိုရဖို့

ပြည်သူကို သေနတ်နဲ့ပစ်တဲ့သူတွေကို

ရှင်းပြချင်နေမလား..

သမိုင်းသင်တာ မ အ အောင်လို့တဲ့ ဗိုလ်ချုပ်ရဲ့..

သမိုင်းအမှန်တွေအမှောင်ချပြီး

သက္ကရာဇ်တွေကျက်ရမှ သမိုင်းအစစ်

ရာဇဝင်ရိုင်းသွားတဲ့

ရှစ်မှတ်တန်YMBAကြီးရဲ့အဖြစ်ကိုလေ

နောက်မျိုးဆက်တွေရဲ့သမိုင်းမှာတော့

အမှန်အတိုင်း ချပြချင်ပါရဲ့..

မ အ ဖို့ဆိုတာ သမိုင်းက စစ်ဦးမှ..

ကြောက်ခေတ်က မဖြစ်ဦးမှ..

ဗိုလ်ချုပ်ရေ ရယ်တော့ရယ်ရသား..

အင်္ဂလိပ်လက်အောက်ကလွတ်ဖို့

တပ်ကိုအားကိုးခဲ့ရတဲ့ခေတ်ကနေ

တပ်လက်အောက်ကလွတ်ဖို့

အင်္ဂလိပ်ကို အကူအညီတောင်းနေရတဲ့အဖြစ်တွေ..

ပြည်သူတွေအေးချမ်းဖို့

ရာဇဝတ်သားတွေဖမ်းတဲ့ထောင်မှာ

ပြည်သူတွေကိုထည့်ဖို့

ရာဇဝတ်သားတွေကိုလွှတ်တယ်..

အစိုးရကိုလွှတ်ပေးဖို့ကိုတော့

သူပုန်တွေကတောင်းဆို

ရဲတွေအကြမ်းဖက်လို့ ပြည်သူနဲ့တိုင်ရသတဲ့..

မျက်ရည်တွေကြားက ရယ်စရာအဖြစ်တွေလေ..

"နောက်မျိုးဆက်အတွက်ပါ

ငါတို့ကရိုးနေပြီ"ဆိုတဲ့စာကို

မြင်ရတော့လည်း ရယ်နေရင်းနဲ့ပဲ ရင်တွေနာရတယ်..

ဘဝတွေဟာ

လွယ်လွယ်လေးတည်ဆောက်ထားရတာ မဟုတ်ကြောင်း

သူ့ဘဝတစ်ခုအတွက်

ဘဝပေါင်းများစွာ လွယ်လွယ်ချနင်းလိုက်တဲ့သူကို

ဘယ်လိုပြောရင်နားလည်နိုင်မလဲ ဗိုလ်ချုပ်ရယ်..

ပန်းတွေမကြွေသင့်ဘဲ ကြွေရတဲ့အခါ

မျက်ရည်တွေသုတ်ရင်း တောက် ခေါက်ရတယ်...

ဗိုလ်ချုပ်ရေ..

ပြည်သူတွေ အိပ်ကောင်းချင်းမအိပ်ရတာ ဆယ့်သုံးရက်

ဗိုလ်ချုပ်ရေ..

အိမ်ကဆူရင် depression ဝင်ချင်တဲ့ မျိုးဆက်

သေနတ်တွေချိန်ထားတဲ့ လမ်းပေါ်ထွက်တာ ဆယ့်သုံးရက်

ဗိုလ်ချုပ်ရေ..

ကောက်ရိုးမီးလိုလူမျိုး ဖွဲမီးလိုမငြိမ်းတာ ဆယ့်သုံးရက်

ဗိုလ်ချုပ်ရေ..

အပတ်တိုင်းမျှော်နေတဲ့ ကိုရီးယားကား ဇာတ်သိမ်းထွက်တာပါမေ့

နားထောင်နေကျသီချင်းတွေအစား သွေးသစ္စာပဲဆိုနေမိတယ်..

ဗိုလ်ချုပ်ရေ..

အနာဂတ်တွေ မမြင်ရတာ ဆယ့်သုံးရက်..

အာဏာရှင်စနစ်ရဲ့ စနစ်တကျရိုက်သွင်းခံထားရတဲ့

အကြောက်တရားနဲ့စိတ်ဒဏ်ရာတွေ ရခဲ့ဖူးသူတွေဟာ

ငါတို့ ကြောက်တတ်ခဲ့လို့ အသက်ရှင်တာတဲ့..

တကယ်တော့ ကြောက်တတ်မှန်းသိလို့ ပြန်လာရဲကြတာ

ကြောက်နေရင် ထပ်လာကြဦးမှာ

ကြောက်တတ်လို့ လူမသေတာကလွဲရင်

ဘဝတွေကိုအခါခါ သတ်နေကြဦးမှာ ဗိုလ်ချုပ်ရဲ့...

မကြောက်ဘူးလားလို့ မေးရင်လည်း

ကြောက်တာပေါ့ ဗိုလ်ချုပ်ရယ်..

အခုကြောက်ရင် တစ်သက်လုံးကြောက်သွားရမှာသိလို့

ကြောက်ရမှာ ပိုကြောက်တယ်..

ဒါပေမယ့် စိတ်ချပါ ဗိုလ်ချုပ်ရဲ့..

ပြည့်သူ့ကျိန်စာဟာ

သံပုံးတီးသံတွေနဲ့အတူ သက်ရောက်စေမှာ..

ပြည်သူ့မေတ္တာဟာ စက္ကန့်တိုင်းမိနစ်တိုင်းမှာ စူးနေမှာ..

ပြည်သူ့အသံဟာ စစ်အာဏာရှင်စနစ်

မကျဆုံးမချင်းညံနေမှာ..

ဗိုလ်ချုပ်ဘက်မှာ ပြည်သူတွေရှိတယ်..

ဗိုလ်ချုပ်သမီးဘက်မှာ ပြည်သူတွေရှိတယ်..

ပြည်သူတွေဘက်မှာလည်း ပြည်သူတွေရှိနေတယ်..

ပြည်သူတွေကိုထိရင် ပြည်သူတွေနဲ့ငြိမယ်..

ပြည်သူကို ပြည်သူက စောင့်ရှောက်နိုင်တဲ့ နိုင်ငံ

ပြည်သူကို ပြည်သူက ရှာကျွေးနိုင်တဲ့နိုင်ငံထက်

ဘယ်နိုင်ငံကများ ဒီမိုကရေစီနဲ့ ထိုက်တန်သေးလို့လဲ..

ဗိုလ်ချုပ်ရေ မွေးနေ့မှာပျော်ရွှင်ပါစေ

မွေးနေ့လက်ဆောင်အဖြစ် ပဲပြုတ်နဲ့နံပြားအပြင်

ပြည်သူတွေရဲ့သတင်းကောင်းပါ မကြာခင်ပေးပါရစေ..

Kha Kha

5:58AM

13/2/2021

ဗိုလ်ချုပ်အသက်106နှစ်ပြည့်မွေးနေ့

၅၂သင်၊ Phoe Thidar၊ Kyi Win နှင့် အခြား ၄၉ ဦး

မှတ်ချက် ၁ ခု

မျှဝေသူ ၈ ဦး

ကြိုက်

မှတ်ချက်ပေးရန်

မျှဝေမယ်

မှတ်ချက်များ

• Bo Maung

  

  • ကြိုက်
  •  · 
    စာပြန်ရန်
  •  · 2 နာရီ