နိုင်ငံတော်သမ္မတအပါအဝင် UECဥက္ကဌကို စာချွန်တော်လျှောက်ထားမှု တရားလွှတ်တော်ချုပ် ၃ပါးထိုင်တရားသူကြီးများက အမှုကိုလက်ခံရန် သင့်၊မသင့် စီရင်ချက်နှင့် အမိန့်များရေးရန် သီးသန့်ထား

 နိုင်ငံတော်သမ္မတအပါအဝင် UECဥက္ကဌကို စာချွန်တော်လျှောက်ထားမှု တရားလွှတ်တော်ချုပ် ၃ပါးထိုင်တရားသူကြီးများက အမှုကိုလက်ခံရန် သင့်၊မသင့် စီရင်ချက်နှင့် အမိန့်များရေးရန် သီးသန့်ထား

------------------------

အချိန်၁လမှ၁လခွဲကြာမြင့်နိုင်

================

ရန်ကုန်၊ဇန်နဝါရီ ၂၉ရက်

နိုင်ငံတော်သမ္မတအပါအဝင် UECဥက္ကဌကို စာချွန်တော်လျှောက်ထားမှု တရားလွှတ်တော်ချုပ် ၃ပါးထိုင်တရားသူကြီးများက အမှုကိုလက်ခံရန် သင့်၊မသင့် စီရင်ချက်နှင့် အမိန့်များရေးရန် သီးသန့်ထားကြောင်း တရားလွှတ်တော်ချုပ်၏ ကြေညာချက်ကို ဥပဒေအကြံပေးဦးခင်မောင်မြင့်က ပြောသည်။

ဇန်နဝါရီ၂၉ရက် ပြည်ထောင်စုတရားလွှတ်တော်ချုပ်၏ စာချွန်တော်အမှုများထုတ်ပြန်ချက်နှင့်ပတ်သက်၍ မေးမြန်းရာတွင် ဥပဒေအကြံပေး ဦးခင်မောင်မြင့်က Myanmar Harp media သို့ပြောကြားခဲ့ခြင်းဖြစ်သည်။

"စပြီးတော့ ရှင်းရှင်းလင်းလင်းပြောရမှာက စာချွန်တော်လျှောက်ထားတယ်ဆိုတာက တရားစွဲတာမဟုတ်ဘူး။လူပုဂ္ဂိုလ်ဆိုင်ရာ တစ်ယောက်ယောက်ကို အရေးယူပေးဖို့ တိုင်ကြားတာလည်းမဟုတ်ဘူး။သူက အုပ်ချုပ်ရေးဆိုင်ရာအဖွဲ့အစည်းတစ်ခုခုသို့မဟုတ်တရားရုံးရဲ့ အမိန့်ညွှန်ကြားချက်လုပ်ထုံးလုပ်နည်းဆောင်ရွက်ချက်ကြောင့် နစ်နာမှုရှိတဲ့နိုင်ငံသားသို့မဟုတ် နိုင်ငံသားအဖွဲ့အစည်းတစ်ရပ်ရဲ့ ဥပဒေအခွင့်အရေးကို ကုစားမှုပေးဖို့ စာချွန်တော်ထုတ်ပြီးတော့ ကုစားမှုပေးဖို့ လျှောက်ထားတာပေါ့။လျှောက်ထားမှာ ဒီကနေ့ဆောင်ရွက်တာကတော့ ဦးဇော်ဝိတ်နဲ့ ဦးစိုးမောင်တို့ ပါတီကစာချွန်တော်အမိန့်နှစ်ခုလျှောက်ထားထားတယ်။ဒီလျှောက်ထားတာတွေကို ရုံးလုပ်ငန်းစနစ်အရ စီစစ်ပြီးတော့မှ တရားမအထွေထွေအမှုဖွင့်လှစ်ပြီးတော့မှ အဲဒီတရားမအထွေထွေအမှုမှာ ဒီလျှောက်ထားထားတဲ့ လျှောက်ထားလွှာတွေကိုပြည်ထောင်စုတရားလွှတ်တော်ချုပ်ကလက်ခံ သင့်၊မသင့်လျှောက်လဲချက်ပေးတာပေါ့။အဲဒီတော့မူလကလျှောက်ထားလွှာနဲ့လျှောက်လဲချက်တွေကို ပြည်ထောင်စုတရားလွှတ်တော်ချုပ်က ဖွဲ့စည်းပေးထားတဲ့ တရားသူကြီး၃ဦးပါတဲ့ အဖွဲ့က ဒါကို ဆက်လက်ကြားနာရန် စစ်ဆေးသင့်မသင့်စီရင်ချက်ချမှတ်ပါမယ်။သူကအမိန့်ရေးမယ်။ စီရင်ချက်ရေးမယ်ပေါ့။အဲဒီအတွက်ဒီအမှုကို သီးသန့်ထားတယ်လို့ဆိုလိုတဲ့သဘောပါပဲ''ဟု ၎င်းကပြောသည်။

ပြည်ထောင်စုတရားလွှတ်တော်ချုပ်၏ ဇန်နဝါရီ၂၉ရက် အမှုများအခြေအနေထုတ်ပြန်ချက်အရ တရားမအထွေထွေလျှောက်ထားမှုစာချွန်တော် အမှုအမှတ်၁၉၈/၂၀၂၀ လျှောက်ထားသူ ဦးဇော်ဝိတ်၊ဆောင်ရွက်ချက် စီရင်ချမှတ်ရန်သီးသန့်ထားသည်ဟုဖော်ပြထားသည်။

နိုင်ငံတော်သမ္မတအပါအဝင် ပြည်ထောင်စုရွေးကောက်ပွဲကော်မရှင်ဥက္ကဌတို့အား တရားလွှတ်တော်ရှေ့နေ ဦးဇော်ဝိတ်နှင့် နိုင်ငံရေးပါတီတစ်ခုမှ ဦးစိုးမောင်တို့က ရွေးကောက်ပွဲအကြောင်းအရာနှင့်ပတ်သက်၍ အာဏာပိုင်မေးစာချွန်တော်တို့ကို လျှောက်ထားစွဲဆိုခြင်းဖြစ်သည်။

"ဒီလိုအရေးကြီးတဲ့အမှုတွေက တစ်လ၊တစ်လခွဲအတွင်းမှာ အမှုခေါ်စာရင်းထွက်ပါလိမ့်မယ်။အမှုခေါ်စာရင်းထွက်တဲ့ရုံးချိန်မှာကြတော့ပဲ။အမိန့်နဲ့ စီရင်ချက်တစ်ခါတည်းချပါမယ်။အဲဒီ စီရင်ချက်ပေါ်မှာ ချမှတ်လိုက်တဲ့ ကနဦး စီစစ်ကြားနာရေးအဖွဲ့ရဲ့ အမှုကိုဆက်လက်ကြားနာရန် သင့်မသင့်အမိန့်ထွက်လာပါလိမ့်မယ်။သူက ဒီလျှောက်ထားထားတဲ့အမှုကိုဆက်လက် စစ်ဆေးရန်သင့်မသင့်အမိန့်ချမယ်။မသင့်ဘူးဆိုရင် အဲဒီလျှောက်ထားလွှာကဒီနားလေးတင်ပြီးသွားပြီး။ပလပ်လိုက်တယ်ဆိုရင်ပြီးသွားပြီ။ရှေ့ဆက်ဘာမှ မလုပ်တော့ဘူး။တရားစီရင်ရေးလုပ်ငန်းဘာမှ မရှိတော့ဘူး''ဟု ဥပဒေအကြံပေး ဦးခင်မောင်မြင့်က ထပ်မံဆိုသည်။

မင်းသီဟန်/Myanmar Harp

၁၁၁၁

မျှဝေသူ ၃ ဦး

ကြိုက်

မှတ်ချက်ပေးရန်

မျှဝေမယ်

မှတ်ချက်များ

မှတ်ချက်တစ်ခု ရေးရန် ...