ရခိုင်တွင် တပ်မတော်၏ လူ့အခွင့်အရေးချိုးဖောက်မှုများ တိုင်တန်းရာတွင် လူ့အခွင့်အရေးကော်မရှင်က အရေးမယူဘဲ ဟန်ပြ လုပ်နေ
By
burmaaffairs
ရခိုင်တွင် တပ်မတော်၏ လူ့အခွင့်အရေးချိုးဖောက်မှုများ တိုင်တန်းရာတွင် လူ့အခွင့်အရေးကော်မရှင်က အရေးမယူဘဲ ဟန်ပြ လုပ်နေ
ရန်ကုန်၊ ဇန်နဝါရီ ၁၈
ရခိုင်ပြည်နယ်တွင် တပ်မတော်နှင့် AA တို့အကြား တိုက်ပွဲများဖြစ်ပွားစဉ် တပ်မတော်က AA ဟု သံသယဖြစ်သူများကို ဖမ်းဆီး စစ်ဆေးမှုများ လုပ်ဆောင်ရာတွင် ကျူးလွန်ခဲ့သော လူ့အခွင့် အရေး ချိုးဖောက်မှုဖြစ်စဉ်များကို မြန်မာနိုင်ငံအမျိုးသားလူ့အခွင့်အရေးကော်မရှင်ထံ တိုင်တန်းသော်လည်း ထိရောက်စွာ အလုပ်မလုပ်နိုင်ဘဲ ဟန်ပြသာ လုပ်ဆောင်နေကြောင်း ရခိုင့် လူ့အခွင့်အရေး ကာကွယ်မြှင့်တင်သူများအဖွဲ့၏ ဒါရိုက်တာဦးမြတ်ထွန်းက ပြောဆိုသည်။
တပ်မတော်နှင့် AA တို့အကြား တိုက်ပွဲများ ပြန်လည် ငြိမ်သက်လာချိန်တွင် တိုက်ပွဲကာလအတွင်း ပျောက်ဆုံးသွားခြင်း၊ ဖမ်းဆီးခံရစဉ် နှိပ်စက်၍ သေဆုံးသွားသော ပြည်သူများနှင့်ပတ်သက်၍ ကျန်ရစ်သူ မိသားစုများက မြန်မာနိုင်ငံအမျိုးသားလူ့အခွင့်အရေးကော်မရှင်ထံသို့ တိုင်ကြားကြကြောင်း၊ သို့ရာတွင် လူ့အခွင့်အရေးကော်မရှင်က စုံစမ်းအရေးယူရန်ထက် ကာကွယ်ရေးဝန်ကြီးဌာနထံ မေးမြန်း၍ ဝန်ကြီးဌာန၏ ပြန်ကြားချက်ကိုသာ ကျန်ရစ်သူ မိသားစုထံ ပြန်လည် ပေးပို့နေကြောင်း ဦးမြတ်ထွန်းက ဆိုသည်။
"မင်းပြားက တစ်မှု၊ မြောက်ဦး ၂ အမှု ၇ မှုလောက်ကို ပျောက်ဆုံးတွေပေါ့။ သူတို့ တင်းမကိစ္စဆိုရင် ကာကွယ်ရေးဝန်ကြီးဌာနဘက်က မဖမ်းဘူးပေါ့။ လူ့အခွင့်အရေး ကော်မရှင်က အလုပ်မဖြစ်ဘူး။ သူတို့ကလည်း ကာကွယ်ရေးဝန်ကြီးဌာနကို အလုပ်သဘောနဲ့ တင်ပြတာပဲရှိတယ်။ ထိရောက်မှုမရှိတဲ့သဘော ။ ဟန်ပြ လုပ်နေတဲ့သဘောပါပဲ။ ကာကွယ်ရေးဝန်ကြီးဌာနက ပြောတဲ့အတိုင်းပဲ တွေ့ရှိရတယ်။ ဖမ်းဆီးတာ မရှိဘူးဆိုပြီး ဒီအတိုင်းပဲ ပြန်ထုတ်တာပဲ" ဟု ဦးမြတ်ထွန်းက ပြောဆိုသည်။
မြန်မာနိုင်ငံ အမျိုးသားလူ့အခွင့်အရေးကော်မရှင်သည် ယခုထက်ပို၍ အလုပ်လုပ်ရန် လိုအပ်ကြောင်း၊ အရပ်သားများကို AA ဟု စွပ်စွဲ၍ သတ်ဖြတ်မှုများသည် စစ်ရာဇဝတ်မှုကျူးလွန်ခြင်းနှင့် လူ့အခွင့်အရေးချိုးဖောက်ခြင်းဖြစ်ကြောင်း ၎င်းက ပြောဆိုသည်။
"အမှန်က ကျနော်တို့ လိုချင်တာက လူ့အခွင့်အရေးကော်မရှင်ဆိုတာက မြန်မာတစ်နိုင်ငံလုံးရဲ့ လူ့အခွင့်အရေးနဲ့ပတ်သက်တဲ့ အဖွဲ့တစ်ဖွဲ့ ဖြစ်တယ်။ အဲဒီတော့ တပ်မတော်ပဲဖြစ်ဖြစ် ဘာပဲဖြစ်ဖြစ် ဝင်ရောက်ပြီးတော့ စစ်ဆေးပိုင်ခွင့်ရှိတယ်လို့ ကျနော်တို့ ယူဆတယ်။ ဒါပေမယ့် အခု သူတို့လုပ်နေတာက အဲဒီလို ပုံစံမျိုးမဟုတ်ဘူး။ စုံစမ်းတာဘာမှ မရှိဘူး။ ဟိုဘက်က ပြန်ပြောတာပဲရှိတယ်။ နှစ်ဖက်တိုက်ပွဲဖြစ်တဲ့အချိန်မှာ အရပ်သားတွေကို AA လို့ စွပ်စွဲပြီးတော့ သတ်ဖြတ်တယ်။ အမျိုးမျိုးနှိပ်စက်တယ်။ စစ်ရာဇဝတ်မှု ကျူးလွန်တာတို့ လူ့အခွင့်အရေးချိုးဖောက်တာတို့ မဖြစ်စေချင်ပါဘူး" ဟု ဦးမြတ်ထွန်းက ဆိုသည်။
ရခိုင်ပြည်နယ်တွင် တိုက်ပွဲကာလအတွင်း အရပ်သားများ ကျည်ထိ၍ သေဆုံးခြင်း၊ ဖမ်းဆီး နှိပ်စက်ခံရ၍ သေဆုံးခြင်းအပါအဝင် စုစုပေါင်း ၅၀၀ နီးပါးရှိကြောင်း ရခိုင်အခြေစိုက် လူ့အခွင့်အရေး အဖွဲ့များထံမှ သိရှိရသည်။
ဓာတ်ပုံ- ရခိုင်တိုက်ပွဲကာလ ကျည်ထိ၍ သေဆုံးသွားကြသော အရပ်သားပြည်သူများ။
ကြိုက်
မှတ်ချက်ပေးရန်
မျှဝေမယ်
Comments
Post a Comment