22 April 2020 20:40(+0630) (လြန္ခဲ့ေသာ 9 နာရီ ခန္႔က)
 |
| ယာဉ်မောင်းနဲ့ နောက်တစ်ဦးဟာ မင်းပြားမြို့နယ် ရာမောင်တံတားအနီးမှာ ပစ်ခတ်ခံရတာဖြစ် |
ရခိုင်ပြည်နယ် မင်းပြားမြို့နယ်မှာ ဧပြီ ၂၀ ရက်နေ့က ကမ္ဘာ့ကျန်းမာရေးအဖွဲ့ချုပ်က ယာဉ်မောင်းတစ်ဦး ပစ်ခတ်ခံရမှုကြောင့်သေဆုံးပြီးနောက် ဧပြီ ၂၁ ရက်နေ့မှာလည်း ပုဂ္ဂလိကကုမ္ပဏီတစ်ခုရဲ့ ကားတစ်စီး ထပ်မံပစ်ခတ်ခံရပြီး ယာဉ်မောင်းဖြစ်သူသေဆုံးသွားတယ်လို့ မင်းပြားမြို့ခံအချို့က ဘီဘီစီကိုပြောပါတယ်။
အဆိုပါယာဉ်မောင်းပစ်ခတ်ခံရတဲ့နေရာဟာ WHOယာဉ်မောင်းအပစ်ခံရတဲ့ ရာမောင်တံတားအနီးမှာ ပဲဖြစ်ပြီး ပစ်ခတ်ခံရကြောင်း နေ့လယ် ၁နာရီဝန်းကျင်ကတည်းက သိရပေမယ့် ညနေ ၄နာရီလောက်မှာမှ သွားရောက်ကူညီနိုင်ခဲ့တယ်လို့ မင်းပြားမြို့နယ် နာရေးကူညီမှုအသင်းက ကိုသက်ထွီးအောင်က ဘီဘီစီကိုပြောပြပါတယ်။
' ' ကမ္ဘောဇဘဏ်ကို ကိုဗစ်-၁၉ ကာကွယ်ရေးအတွက် ပိုးသတ်ဆေးသွားဖျန်းမယ့် ယာဉ်လို့သိရ တယ်။ ယာဉ်မောင်းကတော့ အဲဒီမှာပဲ ဆုံးသွားတာပါ။ ဒဏ်ရာရတဲ့နောက်တစ်ဦးကိုတော့ မင်းပြားဆေးရုံမှာလို အပ်တဲ့ကုသမှုတွေလုပ်ပေးပြီး စစ်တွေဆေးရုံကို ပို့လိုက်ပါပြီ။ သွားကူဖို့ကို မြို့နယ်အုပ်ချုပ်ရေး ကြက်ခြေနီ ပါတဲ့အဖွဲ့တွေအကုန်မှတ်ပုံတင်တွေပေး အားလုံးအဆင့်ဆင့်အကြောင်းကြားပြီးမှသွားကူရတာမို့ ဖြစ်တဲ့ နေရာက သိပ်မဝေးပေမယ့် ၄နာရီလောက် အဲဒီကို အသင်းကားရောက်တယ်''လို့ ကိုသက်ထွီးအောင်က ကယ်ဆယ်ရေးလုပ်ဆောင်နေရတဲ့အခြေအနေကို ရှင်းပြပါတယ်။
WHO ကား ပစ်ခတ်ခံရပြီး ယာဉ်မောင်း သေဆုံးမှု တပ်မတော်နဲ့ အေအေ အပြန်အလှန် စွပ်စွဲ
ရှမ်းပြည်နယ် ဝန်ကြီးချုပ်၊ ရဲမှူးချုပ်နဲ့ ဝန်ကြီးတွေအပါအဝင် လူ ၃၀ လောက် ကိုဗစ်-၁၉ ရှိမရှိ စောင့်ကြည့်ခံနေရ
ထပ်မံပစ်ခတ်ခံရသူတွေဟာ အမ်းမြို့ကနေ စစ်တွေမြို့ကိုသွားတဲ့ CPS ပိုးသတ်ဆေးကုမ္ပဏီက ယာဉ်မောင်း ဦးနွယ်နွယ်မောင် နှင့် ယာဉ်နောက်လိုက် မောင်ဟိန်းထက်ဦးတို့ဖြစ်ပြီး သူတို့ကို အေအေ ဘက်ကပစ်ခတ်ခဲ့တာ ဖြစ်တယ်လို့မြန်မာ့တပ်မတော်က သတင်းထုတ်ပြန်ထားပါတယ်။
အခုပစ်ခတ်ခံရတဲ့နေရာအနီးက ရာမောင်တံတားအနီးမှာ မြန်မာ့တပ်မတော်ရဲ့ကင်းစခန်းတော့ရှိပြီး အနီးအနားကဖားပြိုရွာမှာလည်း ပြီးခဲ့တဲ့ရက်ပိုင်းတွေထဲကတိုက်ပွဲတွေကြောင့် ရွာလုံးကျွတ်ထွက်ပြေးနေရ တဲ့အတွက် ပစ်ခတ်ခံရမှုအခြေအနေကို မျက်မြင်တွေ့နိုင်တာမျိုးတော့မရှိနိုင်ဘူးလို့ မင်းပြားမြို့နယ် လွှတ်တော်ကိုယ်စားလှယ် ဦးလှသိန်းအောင်က ဘီဘီစီကိုပြောပါတယ်။
ဧပြီ ၂၀ ရက်နေ့ကCOVID-19 ဓာတ်ခွဲနမူနာတွေ ပို့ဆောင်ဖို့သွားတဲ့ WHOယာဉ်မောင်း ဦးပြည့်စုံဝင်းမောင် ပစ်ခတ်ခံရမှုနဲ့ပတ်သက်ပြီးတော့ မြန်မာ့တပ်မတော်က အေအေအဖွဲ့ရဲ့ ပစ်ခတ်မှုလို့ ပြောဆိုထားပြီး အေအေဘက်ကတော့ တပ်မတော်ရဲ့ပစ်ခတ်မှုကြောင့် ဒဏ်ရာရခဲ့တဲ့ယာဉ်မောင်းတွေကို ကူညီဖို့ လုပ်ဆောင်ခဲ့တယ်လို့ ပြန်လည် ထုတ်ပြန်ထားပါတယ်။
' ' ဒီမနက်လည်း မင်းပြားမှာ ဂျက်တိုက်လေယာဉ်တွေနဲ့ပစ်နေတာပဲ။မြေကြီးတွေတောင်တုန်တယ်။ လူတွေကတော့ အပြင်မထွက်လို့မဖြစ်တဲ့သူတွေကတော့ ထွက်နေရတာပါပဲ။''လို့ မင်းပြားမြို့ပေါ်က အခြေအနေကို ကိုသက်ထွီးအောင်က ပြောပြပါတယ်။
အခုရက်ပိုင်းအတွင်း မင်းပြားမြို့အနီးဖြစ်ပေါ်နေတဲ့တိုက်ပွဲတွေကြောင့် မင်းရွာ၊ထောင့်ချေရွာနဲ့မြစ်နားရွာ သားတွေ ဟာ တိုက်ပွဲလွတ်ရာကို ထွက်ပြေးတိမ်းရှောင်နေကြရတယ်လို့ ရခိုင်တိုင်းရင်းသားမျိုးနွယ်များ အစည်းအရုံးက ကောက်ယူထားတဲ့စာရင်းတွေအရ သိရပါတယ်။
Comments
Post a Comment