29 April 2020 07:09(+0630) (လြန္ခဲ့ေသာ 11 နာရီ ခန္႔က)
 |
| ရခိုင်ပြည်နယ်ရှိ တပ်မတော် စစ်သားများ |
မြန်မာနိုင်ငံ၊ ရခိုင်ပြည်နယ်မှာ ဖြစ်ပွားခဲ့သော လူမျိုးစုသုတ်သင်ရှင်းလင်းမှုနဲ့ မြန်မာနိုင်ငံ၊ ကချင်ပြည်နယ်နဲ့ ရှမ်းပြည်နယ်တွေမှာ ဖြစ်ပွားခဲ့တဲ့ လူ့အခွင့်အရေးချိုးဖောက်မှုတွေမှာ ပါဝင်ပတ်သက်ခဲ့တဲ့ မြန်မာ့တပ်မတော်ထိပ်တန်းအရာရှိ ၈ ယောက်အပါအဝင် အရာရှိနဲ့ အခြား အဆင့် စုစုပေါင်း ၁၄ ဦးကို ဘဏ္ဍာရေးအရ အရေးယူ ပိတ်ဆို့ ထားတဲ့ စာရင်းကိုဗြိတိန်နိုင်ငံ အစိုးရက ထုတ်ပြန်လိုက်ပါတယ်။ ဧပြီလ ၂၈ ရက်နေ့ ရက်စွဲနဲ့ ဗြိတိန်နိုင်ငံ ဘဏ္ဍာရေး ဝန်ကြီးဌာနက ထုတ်ပြန်တဲ့ စာရင်းမှာ မြန်မာ့ တပ်မတော်က ဒုတိယ ဗိုလ်ချုပ်ကြီး အဆင့် ၁ ဦး၊ ဗိုလ်ချုပ်အဆင့် ၂ ဦးနဲ့ ဗိုလ်မှူးချုပ် အဆင့် ၅ ဦး ပါဝင် ပါတယ်။ သူတို့အားလုံးကို ၂၀၁၈ ခုနှစ်ကစပြီး ဘဏ္ဍာရေးအရ ပိတ်ဆို့ အရေးယူထားတာဖြစ်ပြီး အခုနှစ် ဧပြီလမှာ ထပ်မံ စာရင်းပြုစု ထုတ်ပြန်ခဲ့တာလည်း ဖြစ်ပါတယ်။
ပိတ်ဆို့အရေးယူခံရတဲ့ စာရင်းထဲ ပါဝင်သူ ဒုတိယ ဗိုလ်ချုပ်ကြီး အောင်ကျော်ဇောဟာ ၂၀၁၅ က ၂၀၁၇ ခုနှစ် အတွင်း အမှတ် (၃) စစ်ဆင်ရေး အထူးအဖွဲ့မှူး အဖြစ်တာဝန်ယူခဲ့သူ ဖြစ်ပြီး ဗိုလ်ချုပ်မောင်မောင်စိုးက ၂၀၁၆ က ၂၀၁၇ ခုနှစ် အတွင်း အနောက်ပိုင်းတိုင်း စစ်ဌာနချုပ် တိုင်းမှူး အဖြစ် တာဝန်ထမ်းဆောင်ခဲ့သူ ဖြစ်ပါတယ်။ လက်ရှိ အနောက်တောင်ပိုင်း စစ်ဌာနချုပ် တိုင်းမှူး ဗိုလ်ချုပ် ညီညီဆွေက အရင် မြောက်ပိုင်း တိုင်း စစ်ဌာနချုပ် တိုင်းမှူးဖြစ်ပါတယ်။ ဗိုလ်မှူးချုပ်အဆင့် အရာရှိတွေထဲ တော့ အမှတ်(၃၃)ခြေမြန်တပ်မ၊ တပ်မမှူး ဗိုလ်မှူးချုပ် အောင်အောင်၊ အမှတ် (၉၉) တပ်မမှူးဖြစ်ခဲ့ဖူးသူ လက်ရှိ အရှေ့မြောက်ပိုင်းတိုင်း စစ်ဌာနချုပ်တိုင်းမှူး ဗိုလ်မှူးချုပ် ခင်လှိုင်၊ နယ်ခြားစောင့် ရဲ တပ်ဖွဲ့ ရဲမှူးချုပ်အဖြစ် တာဝန်ယူခဲ့သူ ဗိုလ်မှူးချုပ် သူရ ဆန်းလွင်၊ အမှတ် (၉၉) ခြေမြန်တပ် တပ်မမှူး ဗိုလ်မှူးချုပ် သန်းဦး၊ အမှတ် (၁၅) စစ်ဆင်ရေးဆိုင်ရာ ကွပ်ကဲရေးဌာန တပ်မမှူး ဗိုလ်မှူးချုပ် ခင်စိုး တို့ ဖြစ်ပါတယ်။
အလားတူပဲ အဲဒီ တပ်မတော် ထိပ်တန်း အရာရှိကြီးတွေကို အမေရိကန် ဘဏ္ဍာရေးဝန်ကြီးဌာန၊ နိုင်ငံခြားပိုင် ပစ္စည်း ထိန်းချုပ်ရေးရုံး (OFAC) ကလည်း ၂၀၁၈ ကတည်းက အရေးယူ ဒဏ်ခတ် ပိတ်ဆို့မှုတွေကိုပြုလုပ်ထားခဲ့ပါတယ်။
ဗွီအိုအေ (မြန်မာပိုင်း)
Comments
Post a Comment