NARINJARA
ချင်းပြည်နယ် ပလက်ဝမြို့နယ်အနီး တပ်မတော်နဲ့ အေအေ လက်နက်ကိုင်အဖွဲ့ အကြား တိုက်ပွဲတွေ ပြင်းထန်စွာ ဖြစ်ပွားနေပြီး ဧပြီလ၂၂ ရက်နေ့ ညနေပိုင်းက ပလက်ဝ မြန်မာ့စီးပွားရေးဘဏ် ပရဝဏ် အတွင်း လက်နက်ကြီးကျည်ကျခဲ့ကာ လူ ၃ ဦး သေဆုံးခဲ့တယ်လို့ ချင်းပြည်နယ်အစိုးရအဖွဲ့က ဘီဘီစီကို ပြောပါတယ်။
သေဆုံးခဲ့သူတွေဟာ ဘဏ်ဝန်ထမ်း အမျိုးသမီးတစ်ဦးနဲ့ ကလေး ၂ ဦးဖြစ်ပြီးတော့ ပလက်ဝမြို့ပေါ်ကိုကျော်ကာ လက်နက်ကြီးတွေ အပြန်အလှန်ပစ်ခတ်နေရာကနေ လက်နက်ကြီးကျည်ကျလာတာဖြစ်တယ်လို့လည်း ချင်းပြည်နယ် စည်ပင်သာယာရေးဝန်ကြီး ဦးစိုးထက်က ပြောပါတယ်။
လက်နက်ကြီးကျည်က ဘယ်အဖွဲ့ဘက်က ပစ်တယ်ဆိုတာ မသိရကြောင်းလည်း သူက ဘီဘီစီကို ပြောပါတယ်။
"ဘဏ်ဝန်ထမ်း အမျိုးသမီးနဲ့ ၄ နှစ် အရွယ် သူ့သမီးလေးရယ်၊ နောက် ကလေးတစ်ယောက်က ယောက်ျားလေးဖြစ်တယ် "လို့လည်း သေဆုံးခဲ့တဲ့သူတွေ အကြောင်းသူက ပြောပါတယ်။
HKAWN SAN
တပ်မတော်ဘက်ကတော့ "ယနေ့ညနေပိုင်းမှာ AA အကြမ်းဖက် သောင်းကျန်းသူများက လက်နက်ကြီး၊ လက်နက်ငယ်များ ဖြင့် အကြောင်းမဲ့ နှောင့်ယှက် ပစ်ခတ်မှုကြောင့် မြို့တွင်းရှိမြန်မာ့စီးပွားရေးဘဏ်အနီး ကျရောက်ပေါက်ကွဲခဲ့သဖြင့် ဘဏ်ဝန်ထမ်းများနှင့် မိသားစုဝင်များ သေဆုံး၊ ဒဏ်ရာရရှိခဲ့" လို့ ထုတ်ပြန်ထားပါတယ်။
အေအေဘက်ကတော့ တစ်စုံတစ်ရာ တုံ့ပြန်ပြောကြားတာ မတွေ့ရသေးပါဘူး။
လက်နက်ကြီးကျတဲ့နေရာ ဘဏ် အဆောက်အအုံဟာ ပလက်ဝမြို့လယ်မှာရှိတဲ့ မြို့မရပ်ကွက်မှာ တည်ရှိတာ ဖြစ်ပါတယ်။
ပလက်ဝမြို့ခံတွေထဲက တိုက်ပွဲကြောင့် ဒဏ်ရာရသူတွေ ရှိပြီးတော့ လူ၂ ဦး ဆေးရုံမှာ တက်ရောက်ကုသမှု ခံနေရတယ်လို့လည်း ဦးစိုးထက်က ပြောပါတယ်။
တပ်မတော် နဲ့အေအေ လက်နက်ကိုင်တို့ အကြား၊ ရခိုင်နဲ့ ချင်းပြည်နယ် ပလက်ဝမြို့နယ် အတွင်းမှာ ၂၀၁၈ နိုဝင်ဘာလ ကစပြီး တိုက်ပွဲတွေ ဖြစ်ပွားနေတာပါ။
ချင်းပြည်နယ် ပလက်ဝမြို့အနီးမှာ ဧပြီ ၇ ရက်က လည်း တိုက်ပွဲတွေ ဖြစ်ပွားခဲ့ပြီး တပ်မတော်က လေကြောင်းပစ်ခတ်မှုကြောင့် အရပ်သား ၇ ဉီး သေဆုံး၊ ၈ ဦးထိခိုက် ဒဏ်ရာရရှိခဲ့သလို နေအိမ်တွေလည်း မီးလောင်ခဲ့တယ်လို့ ခူမီးချင်းမျိုးနွယ်စုများရေးရာ ပေါင်းစပ် ညှိနှိုင်းရေးကောင်စီ(KACC)ဥက္ကဋ္ဌ ဦးကျော်ငြိမ်းက ပြောပါတယ်။
KYAW AUNG
ပလက်ဝမြို့ဟာ ချင်းပြည်နယ်၊ တောင်ပိုင်း မင်းတပ်ခရိုင်မှာ ပါဝင်ပြီးတော့ ရခိုင်ပြည်နယ်အထိ စီးဆင်းသွားတဲ့ ကုလားတန်မြစ် အနောက်ဘက်ကမ်းမှာ တည်ရှိပါတယ်။
ကုလားတန်မြစ်ကြောင်းအတိုင်း စစ်တွေမြို့ကနေ ၉၆ မိုင် ဝေးပြီးတော့၂၀၁၄ ခုနှစ် သန်းခေါင်စာရင်းအရ ပလက်ဝမြို့နယ် တစ်ခုလုံး လူဦးရေ ၆ သောင်းကျော်ရှိပါတယ်။
ခမီချင်းလူမျိုး အများဆုံး နေထိုင်ကြပြီးတော့ ရခိုင်လူမျိုးတွေလည်းနေထိုင်ကြပါတယ်။
အခုတိုက်ပွဲဖြစ်နေတာ ဟာ ကုလားတန်မြစ် ဟိုဘက်ခြမ်းနဲ့ဒီဘက်ခြမ်း အေအေနဲ့ တပ်မတော်တို့ အပြန် အလှန်တိုက်ပွဲဖြစ်နေတာလို့လည်း ဦးစိုးထက်က ဘီဘီစီကိုပြောပါတယ်။
Comments
Post a Comment