၂၀၂၀ အထွေထွေရွေးကောက်ပွဲ အောင်နိုင်ရေးအတွက် ပါတီ ထိပ်ပိုင်းခေါင်းဆောင် ၄ ဦးက အဓိက ဦးဆောင်သွားမည် ဖြစ်ကြောင်း အမျိုးသား ဒီမိုကရေစီ အဖွဲ့ချုပ် (NLD) ပါတီ၏ ပြောရေးဆိုခွင့်ရှိသူ ဒေါက်တာ မျိုးညွန့်က ပြောသည်။
ဦးဆောင်မည့်သူ ၄ ဦးမှာ NLD ပါတီ ဒု ဥက္ကဋ္ဌ -၂ ဒေါက်တာ ဇော်မြင့်မောင်(မန္တလေးတိုင်း ဝန်ကြီးချုပ်)၊ ဗဟို အလုပ်အမှု ဆောင် အတွင်းရေးမှူး အဖွဲ့ဝင် ဦးဉာဏ်ဝင်း၊ ဦးဟံသာမြင့်နှင့် ဒေါက်တာ အောင်မိုးညို(မကွေးတိုင်း ဝန်ကြီးချုပ်) တို့ ဖြစ် ကြသည်။
ထို့အတွက် ပါတီ ဗဟို အလုပ်အမှုဆောင် အဖွဲ့ဝင် ဒေါက်တာ အောင်မိုးညိုအား အတွင်းရေးမှူး အဖွဲ့ဝင်-၃ အဖြစ် NLD ပါတီက ယနေ့ (အောက်တိုဘာလ ၂၉ ရက်) တွင် ရာထူးတိုးကာ အတည်ပြု ခန့်အပ်ခဲ့ခြင်းလည်း ဖြစ်သည်။
ဒေါက်တာ မျိုးညွန့်က “ဒုဥက္ကဋ္ဌ -၂ ရယ် အတွင်းရေးမှူး ၃ ဦးက ဗဟိုအလုပ်အမှုဆောင် အဖွဲ့ကို ဦးဆောင်သွားဖို့ ဆိုပြီး ရည်ရွယ်ထုတ်ပြန် လိုက်တာ ဖြစ်ပါတယ်။ ပါတီလုပ်ငန်းတွေ သွက်လက် လျှင်မြန်ဖို့နဲ့ စည်းရုံးရေးလုပ်ငန်းတွေ တိုးချဲ့တာ အားလုံးက အောင်နိုင်ရေးအတွက် အကျိုးသက်ရောက်ပါတယ်။ ၂၀၂၀ အောင်နိုင်ရေး ကြိုတင် ပြင်ဆင်တဲ့ သဘောလည်း ပါပါတယ်။ ဒီ ၄ ဦးက အဓိက ဦးဆောင်သွားမှာပါ” ဟု ပြောသည်။
NLD အနေဖြင့် လတ်တလောတွင် ပါတီဥက္ကဋ္ဌ ဒေါ်အောင်ဆန်းစုကြည်နေရာအတွက် အပြောင်းအလဲ ပြုလုပ်ရန် မရှိသေး ဘဲ ဒေါက်တာ အောင်မိုးညိုအား အတွင်းရေးမှူး-၃ အဖြစ် ခန့်အပ်လိုက်ခြင်းသည် မကြာခဏ မေးခွန်းထုတ်လေ့ရှိကြ သည့် ပါတီအား အစဉ်လိုက် အဆင့်ဆင့် တာဝန်ယူကြမည့် ရာထူး အစဉ်အဆက်အား ပြသချင်၍ ဖြစ်ကြောင်းလည်း ၎င်း က ရှင်းပြသည်။
ဒေါက်တာအောင်မိုးညိုက “ဘာမှတော့ အထူး ပြောစရာတော့ မရှိပါဘူး။ တာဝန်ပေးတယ်ဆိုတော့ အတတ်နိုင်ဆုံး ကျေ ပွန်အောင် ထမ်းဆောင်ရမှာပေါ့လေ။ အတွင်းရေးမှူး ၃ ဆိုတော့ သာမန် ဗဟိုအလုပ်အမှုဆောင်ထက် ပိုပြီးတော့ တာဝန် ကြီးမှာပါ။ ရာထူးတိုးတယ် မတိုးတာထက် တာဝန်ကြီးတာတော့ အမှန်ပဲ”ဟု ပြောသည်။
၂၀၂၀ ရွေးကောက်ပွဲတွင်လည်း တိုင်းနှင့်ပြည်နယ် အသီးသီးမှ လက်ရှိ ဝန်ကြီးချုပ်များမှာ ပြန်လည် ပါလာနိုင်ဖွယ် ရှိနေပြီး ၎င်းတို့၏ ၅ နှစ်တာ အုပ်ချုပ်ရေး အတွေ့အကြုံများသည် ပါတီအတွက် အဖိုးမဖြတ်နိုင်သည့် အရာများ ဖြစ်ကြောင်းလည်း ဒေါက်တာ မျိုးညွန့်က ပြောသည်။
မကွေးတိုင်း ဝန်ကြီးချုပ် ဒေါက်တာ အောင်မိုးညိုက “ရွေးကောက်ပွဲ အောင်နိုင်ရေးအတွက် ကြိုးစားပြီး လုပ်ရမှာပါ။ လာ မယ့် ရွေးကောက်ပွဲမှာ ကျန်းမာရေး အရ ကောင်းနေမယ်၊ တာဝန်လဲပေးမယ် ဆိုရင်တော့ ပြိုင်ရမှာပါပဲ” ဟု ဆိုသည်။
NLD ပါတီအနေဖြင့် လူထုအကျိုးပြု လုပ်ငန်းများနှင့် ရွေးကောက်ပွဲ အောင်နိုင်ရေးအတွက် ဆောင်ရွက်လျက် ရှိရာတွင် ၂၀၂၀ ရွေးကောက်ပွဲ အလွန် အစိုးရ ဖွဲ့စည်းရေး အတွက် လျာထား/ စဉ်းစားထားသူများ ရှိသော်လည်း စာရင်းနှင့် တကွ ပြုစုသတ်မှတ်ရန်အထိ မရှိသေးကြောင်း ဒေါက်တာ မျိုးညွန့်က ပြောဆိုသည်။
၂၀၂၀ ရွေးကောက်ပွဲတွင် ပြည်သူများ အနေဖြင့် ပါတီတခုတည်းကိုသာ ကြည့်ပြီး မဲပေးတော့မည် မဟုတ်သည့်အတွက် လွှတ်တော် ကိုယ်စားလှယ်များ အနေဖြင့် ကိုယ့်ကိုယ်ကိုယ် ပြုစုပျိုးထောင်ကာ ဝမ်းစာပြည့်နေရန် လိုအပ်ကြောင်း ပါတီ ဒု ဥက္ကဋ္ဌ-၂ ဒေါက်တာ ဇော်မြင့်မောင်က အောက်တိုဘာ ၂၄ ရက်က ပြုလုပ်သည့် ရန်ကုန်တိုင်း ဒေသကြီး အစိုးရအဖွဲ့၊ လွှတ် တော်၊ ပါတီ သုံးပွင့်ဆိုင် တွေ့ဆုံပွဲ၌ သတိပေးထားသည်။
ဧရာဝတီ
Comments
Post a Comment