ဝင်းနှင့်ဇော်အတွက် ထိုင်းဘုရင်ထံ အသနားခံစာတင်ရန် ညှိနှိုင်းဆောင်ရွက်လျက်ရှိကြောင်း အလုပ်သမားဝန်ကြီးဌာန၀န်ကြီး ဦးသိန်းဆွေ ပြော
ဝင်းနှင့်ဇော်အတွက် ထိုင်းဘုရင်ထံ အသနားခံစာတင်ရန် ညှိနှိုင်းဆောင်ရွက်လျက်ရှိကြောင်း အလုပ်သမားဝန်ကြီးဌာန၀န်ကြီး ဦးသိန်းဆွေ ပြော
------ ------ ------ ----- -----
လိပ်ကျွန်းလူသတ်မှုတွင် သေဒဏ်ပေးခံရသူ မြန်မာနိုင်ငံသား ၂ ဦးအတွက် ထိုင်းဘုရင်ထံ အသနားခံစာ တင် ရန်အတွက် ၀န်ကြီးဌာနအနေနှင့် သက်ဆိုင်ရာနှင့်ညှိနှိုင်းဆောင်ရွက်လျက်ရှိကြောင်း အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေက စက်တင်ဘာ ၂ ရက်တွင် ပြောကြားသည်။
“လိပ်ကျွန်းကိစ္စနဲ့ပတ်သက်ပြီး အမြင့်ဆုံးတရားရုံးက သေဒဏ်ကို အတည်ပြုတယ်လို့ ပြောပါတယ်။ ဆက်ပြီးတော့လုပ်မယ့်ကိစ္စကတော့ ထိုင်းဘုရင်မင်းမြတ်ဆီကို အသနားခံစာတင်ဖို့ပဲရှိပါတယ်။ ဒါနဲ့ပတ်သက်လို့ ထိုင်းမှာရှိတဲ့အဖွဲ့အစည်းတွေကလည်း ဆောင်ရွက်ဖို့စီစဉ်နေပါပြီ။ မြန်မာနိုင်ငံဘက်က လွှတ်တော်ကိုယ်စားလှယ်၊ လွှတ်တော်ဥက္ကဌတွေကိုယ်တိုင် သက်ဆိုင်ရာထိုင်းနိုင်ငံအကြီးအကဲတွေထံ မေတ္တာရပ်ခံစာတွေပေးပို့ပြီး ဆောင်ရွက်နေကြပါတယ်”ဟု ၀န်ကြီးက ပြောသည်။
အဆိုပါဝန်ကြီးဌာနရုံးတွင် စက်တင်ဘာ ၂ ရက်က ပြုလုပ်သည့် အလုပ်သမားရေးရာပူးပေါင်းဆောင်ရွက်ရေး လုပ်ငန်းကော်မတီအစည်းအဝေးအပြီးတွင် လိပ်ကျွန်းလူသတ်မှုနှင့် ပတ်သက်၍ သတင်းထောက်များ၏မေးမြန်းမှုကို ပြည်ထောင်စုဝန်ကြီးက ယင်းသို့ ပြောကြားခြင်းဖြစ်သည်။
ခိုတောင်ကျွန်း(လိပ်ကျွန်း)တွင် ၂၀၁၄ ခုနှစ်က ဗြိတိန်နိုင်ငံသားစုံတွဲ အသတ်ခံရမှုဖြင့် မြန်မာနိုင်ငံသားနှစ်ဦး သေဒဏ်ချမှတ်ခံထားရမှုအပေါ် နောက်ဆုံးအယူခံလျှောက်ထားခဲ့ရာ ပြီးခဲ့သည့်သြဂုတ် ၂၉ ရက် အယူခံကို ပယ်ချခဲ့ခြင်းဖြစ်သည်။
လိပ်ကျွန်းလူသတ်မှုဖြင့် မြန်မာနိုင်ငံသား ၂ ဦးဖမ်းဆီးခံရချိန်မှစ၍ ၎င်းတို့နှစ်ဦးလွတ်မြောက်ရေး အစစအရာရာကူညီဆောင်ရွက်ရန် နိုင်ငံအကြီးအကဲများကိုယ်တိုင် ညွှန်ကြားထားပြီဖြစ်ကြောင်း၊ ဌာနအနေနှင့်လည်း အလုပ်သမားသံအရာရှိများ၊ သံအမတ်ကြီးအပြင် ထိုင်းတွင်ရှိသည့် အလုပ်သမားရေးရာအဖွဲ့အစည်းများကလည်း အဆင့်လိုက် ကူညီပေးလျက်ရှိသကဲ့သို့ ပုဂ္ဂလိကလုပ်ငန်းရှင် ဦးဇော်ဇော်ကလည်း အမှုနှင့်ပတ်သက်သည့်ကုန်ကျစရိတ်များ ကျခံပေးလျက်ရှိကြောင်း ၀န်ကြီး ဦးသိန်းဆွေက ပြောသည်။
၂၀၁၄ ခုနှစ်စက်တင်ဘာလလယ်က ထိုင်းနိုင်ငံ ကော့စမွီခရိုင်၊ကော့တောင်ကျွန်း(လိပ်ကျွန်း)ဆိုင်ရီး ကမ်းခြေတွင် ဗြိတိန် နိုင်ငံသား စုံတွဲ ၂ ဦး သတ်ခံရသည့်ဖြစ်စဉ်တွင် မြန်မာရွှေ့ပြောင်းလုပ်သား ၂ ဦးဖြစ်သည့်ဝင်းဇော်ထွန်းနှင့်ဇော်လင်း (၀င်းနှင့်ဇော်) တို့ကို တရားခံများအဖြစ် ထိုင်းအာဏာပိုင်များက စွပ်စွဲဖမ်းဆီးခဲ့သည်။
ထွန်း(နေပြည်တော်)
#News Watch
#News Watch
Comments
Post a Comment