ဒီမိုကရေစီ ဖက်ဒရယ်ပြည်ထောင်စု တည်ဆောက်ရေးအတွက် NLD ဦးဆောင်နေတယ်လို့ ဦးဥာဏ်ဝင်း ပြော

27 September 2018 20:16(+0630) (လွန်ခဲ့သော 9 နာရီ ခန့်က)

ရန်ကုန်မြို့မှာ ကျင်းပတဲ့ NLD ပါတီ ဖွဲ့စည်းတည်ထောင်တဲ့ နှစ် ၃ဝ ပြည့်အခမ်းနားကို ၂ဝ၁၈ ခုနှစ်၊ စက်တင်ဘာလ ၂၇ ရက်နေ့က တွေ့ရစဉ်။ Photo: Htet Arkar/RFA

အမျိုးသားဒီမိုကရေစီအဖွဲ့ချုပ်ဟာ ဒီမိုကရေစီ ဖက်ဒရယ်ပြည်ထောင်စု တည်ဆောက်ရေးမှာ ဦးဆောင်နေတဲ့ ပါတီဖြစ်တယ်လို့ NLD ပါတီ ဗဟိုအလုပ်မှုဆောင် ကော်မတီဝင် ဦးဥာဏ်ဝင်းက ဒီနေ့ မိန့်ခွန်းမှာ ထည့်သွင်းပြော ကြားခဲ့ပါတယ်။

ဒီကနေ့  ရန်ကုန်မြို့မှာ ကျင်းပတဲ့ NLD ပါတီ ဖွဲ့စည်းတည်ထောင်တဲ့ နှစ်သုံးဆယ်ပြည့်အခမ်းနားမှာ သဘာပတိ အဖြစ် ဆောင်ရွက်တဲ့ ဦးဥာဏ်ဝင်းက ပြောပါတယ်။

သို့ပေမယ့် ငြိမ်းချမ်းရေးနဲ့ ပတ်သက်လို့ အစိုးရနဲ့ တိုက်ရိုက်မသက်ဆိုင်ကြောင်းနဲ့ ဒေါက်တာ တင်မျိုးဝင်း ဦးဆောင်တဲ့ ငြိမ်းချမ်းရေးကော်မရှင်က ဆောင်ရွက်နေတဲ့ သီးသန့်ကိစ္စသာဖြစ်ကြောင်း မြောက်ပိုင်းက တိုင်းရင်းသား လက်နက်ကိုင်အဖွဲ့တွေ ငြိမ်းချမ်းရေးဖြစ်စဉ်မှာ ပါဝင်လာရေးနဲ့ ပတ်သက်လို့ သတင်းထောက်တွေက မေးမြန်းရာမှာ ဦးဥာဏ်ဝင်းက ပြောပါတယ်။

ငြိမ်းချမ်းရေးနဲ့ ပတ်သက်ပြီး တိုင်းရင်းသား အဖွဲ့တွေနဲ့ ထိတွေ့ဆက်သွယ်နေတဲ့ အဖွဲ့ကတော့ အစိုးရက ဖွဲ့စည်းထားတဲ့ အမျိုးသားပြန်လည်သင့်မြတ်ရေးနဲ့ ငြိမ်းချမ်းရေးဗဟိုဌာန NRPC ဖြစ်ပါတယ်။

ဒါ့အပြင် NLD ပါတီဝင်တွေ၊ အစိုးရအဖွဲ့ဝင်တွေနဲ့ လွှတ်တော် ကိုယ်စားလှယ်တွေအနေနဲ့ အဂတိတရား ကင်းရှင်းမှသာ ပြည်သူတွေ စီးပွားရေး လုပ်ပျော်ပြီး တရားမျှမျှတတ ယှဉ်ပြိုင်ခွင့်ကို ရမှာဖြစ်တာကြောင့် အဂတိ ကင်းရှင်းရေး ကြိုးပမ်းကြဖို့  NLD ပါတီ တည်ထောင်တာ နှစ် ၃၀ ပြည့် အခမ်းအနား သ၀ဏ်လွှာမှာ ဖော်ပြထားပါတယ်။

အဂတိ တရားကင်းရှင်းမှသာ တိုင်းပြည်စီးပွားရေး တည်ငြိမ်လာမယ်လို့လည်း ပါရှိပါတယ်။

ရန်ကုန်မြို့ ရွှေဂုံတိုင်က NLD ပါတီ ရုံးချုပ်မှာ ဒီနေ့ ကျင်းပတဲ့ နှစ်၃၀ ပြည့်အခမ်းအနားကို ကြံ့ခိုင်ဖွံ့ဖြိုးရေးပါတီ၊ SNLD၊ ပြည်သူ့ပါတီ စတဲ့ နိုင်ငံရေးပါတီတွေနဲ့ နိုင်ငံတကာက သံတမန်တွေလည်း တက်ရောက်ခဲ့ကြပါတယ်။

RFA Burmese