26 July 2018
 |
| ၀မ့်ဖိန်းခမ်းဘုန်းကြီးကျောင်းရောက် စစ်ဘေးရှောင်များ အသီးသီးနေရပ်ပြန်နေကြသည်ကိုတွေ့ရစဉ် Photo: SSM |
ဇူလိုင်လဆန်းပိုင်းမှစ၍ ယနေ့အထိ သျှမ်းပြည်တောင်ပိုင်း ကျေးသီးမြို့နယ် – မတ်ဝေါင်းကျေးရွာ၊ နမ့်အုပ်ကျေးရွား၊ ဟိုပုံကျေးရွာ ဘက်တို့လည်းကောင်း၊ မိုင်းကိုင်မြို့နယ် – ဟမ်းငိုင်းကျေးရွာအုပ်စု၊ ဟိုခိုင်းကျေးရွာအုပ်စု၊ တုံလောဝ်ကျေးရွာအတွင်းသို့ အစိုးရတပ်မတော် တပ်မ ၃၃ လက်အောက်ခံ တပ်ရင်းများအပါအဝင် တပ် ၁၀ ရင်း ထက်မနည်း အင်အားဖြည့်ကာ သျှမ်းပြည်တပ်မတော် RCSS/SSA အခြေချလှုပ်ရှားရာ ကျေးရွာသို့ ပိုက်စိပ်တိုက်ရှာဖွေနေကြောင်း ဒေသခံများ ပြောပြချက်အရသိရသည်။
စစ်ကြောင်းက ကျနော်တို့ကိုလာမေးတယ်။ RCSS/SSA တပ်ဖွဲ့ဘယ်မှာလဲတဲ့။ မပြောပြရင်လဲ ရိုက်နက်ခံရမှာ ကြောက်တယ် – ဟု တပ်မတော်စစ်ကြောင်း နှင့်ကြုံတွေ့သည့် ကျေးသီးရောက် ရွာအကြီးအကဲ တဦးကပြော သည်။
RCSS/SSA ၏ပြောခွင့်ရ ဒု-ဗိုလ်မှူးကြီးစိုင်းဦးက – “တိုက်ပွဲက ၂၃ ရက်နေ့ မနက်ပိုင်းမှာ ၁ နာရီခန့်အကြာ လောက်ဖြစ်ပွါးခဲ့တယ်။ ကျနော်တို့က မိမိကိုယ်ကိုကာကွယ်တာဘဲဖြစ်တယ်။ အစိုးရတပ်က တပ်ရင်း ၂ ရင်း ၃ ရင်းပူးပေါင်းအင်အား ၁၀၀ လောက်ကကျနော်တို့အဖွဲ့ကိုလိုက်လံပစ်ခတ်တယ်။ ကျနော်တို့ကို သတ်မှတ် နေရာဆီကိုတပ်ဆုတ်ဖို့ ပြောတယ်။ သတ်မှတ်နေရာက မှ မရှိသေးတာ။ ကျနော်တို့ တပ် တွေ ဒီနေရာဘက် လှုပ်ရှားနေထိုင်လာတာ ဟိုးအရင်ကတည်းကဘဲ”- ဟု သျှမ်းသံတော်ဆင့်အားပြောသည်။
ဇူလိုင်လ ၂၄ ရက်နေ့ကလည်း ကျေးသီးမြို့နယ်၊ မိုင်းနောင်မြို့နယ်တို့မှ စစ်အင်အားများထပ်မံဖြည့်တင်း ကာလှုပ်ရှားနေကြောင်း၊ ဒေသခံများအနေဖြင့်လည်း အချိန်မရွေး တိုက်ပွဲပြန်လည်ဖြစ်ပွါးကြမည်ကို စိုးရိမ်နေကြကြောင်း ဆိုပါသည်။
“ကျနော်တို့က တတ်နိုင်သလောက်တော့ တိုက်ပွဲမဖြစ်အောင် ရှောင်ပါတယ်။ သို့ပေမယ့် သူတို့က အင်အားဖြည့်ပြီး ကျနော်တို့နောက်ထပ်လိုက်လာနေမယ်ဆိုရင်တော့ ထိပ်တိုက်တွေ့မိရင် ပစ်ခတ်မှုဖြစ်ပွါးမိမှာပါဘဲ။ ”- ဟု ဒု-ဗိုလ်မှူးကြီးစိုင်းဦးကပြောသည်။
ဇူလိုင် ၂၄ နှင့် ယနေ့ ၂၅ ရက်နေ့တို့တွင် ပစ်ခတ်တိုက်ခိုက်မှုများငြိမ်နေပြီဖြစ်သဖြင့် ဒေသခံများ နေရပ်ပြန်ကုန်ပြီဖြစ်ကြောင်း ကျေးသီးမြို့ နယ် ပြည်သူ့လွှတ်တော် ကိုယ်စားလှယ် စိုင်းစံမိန်း က သျှမ်းသံတော်ဆင့် သို့ ပြောသည်။
“ တိုက်ပွဲတွေ မရှိတော့ဘူး။ ဒါကြောင့် စစ်ဘေးရှောင် တွေ အားလုံး သူတို့ နေရပ်ပြန်သွားပြီ။ ဝမ့်ဖိန်း ဘုန်းကြီးကျောင်းမှာ ၂ ရက် ရှောင်နေကြတယ်။ မနေ့က ကျနော်တို့ကျေးသီးမြို့နယ်ပါတီ ကတောင်မှ စားနပ်ရိက္ခာတွေ သွားကူညီထောက်ပံ့တယ်။ ရလခတိုင်းကလည်းလာထောက်ပံ့တယ်။ လယ်ဆင်း ချိန်ဖြစ်နေလို့ စိုးရိမ် စိတ်နဲ့ ပြန်သွားကြတယ်။ ” ဟု စိုင်းစံမိန်းကပြောသည်။
သျှမ်းပြည်တောင်ပိုင်း ကျေးသီးမြို့နယ်အတွင်း သျှမ်းပြည်ပြန်လည်ထူထောင်ရေးကောင်စီ သျှမ်းပြည် တပ်မတော်အား အစိုးရတပ်မတော်က လိုက်လံပစ်ခတ်တိုက်ခိုက်မှုကြောင့် ဇူလိုင်လ ၂၃ ရက်နေ့ က ဟိုပုံအုပ်စု မတ်ဝေါင်းရွာနှင့် နမ့်အုပ်ရွာမှ ရွာသား ၁၀၀ ခန့်သည် ၀မ့်ဖိန်းခမ်းဘုန်းကြီးကျောင်းသို့စစ်ဘေး တိမ်းရှောင်လာခဲ့ကြခြင်းဖြစ်ပါသည်။
သျှမ်းပြည်တပ်မတော် RCSS/SSA သည် နေပြည်တော် အစိုးရ နှင့် တနိုင်ငံလုံးအပစ်အခတ်ရပ်စဲရေးစာချုပ် NCA လက်မှတ်ရေးထိုးထားသည့် သျှမ်းလက်နက်ကိုင်တပ်တခုဖြစ်သည်။
သျှမ်းသံတော်ဆင့်၊ နန်းဆိုင်နွမ်
Comments
Post a Comment