ဒုက္ခသည်တွေ ပြန်ပို့ရေး ဘင်္ဂလားဒေ့ရှ် ထပ်မံပြောကြား

https://streamer1.rfaweb.org/stream/BUR/BUR-2018-0728-0030.mp3

2018-07-27

ဘင်္ဂလားဒေ့ရ်ှနိုင်ငံ ကောက်စ်ဘဇား ဒုက္ခသည်စခန်းက မွတ်စလင်မိသားစုကို တွေ့ရစဉ်

Photo: AFP

ဘင်္ဂလားဒေ့ရ်ှဟာ မြန်မာနိုင်ငံကဒုက္ခသည် ၁ သန်းခန့်ကို နေစရာပေး ထောက်ပံ့ကူညီနေပြီး အဲဒါဟာ ဒုက္ခရောက်နေသူတွေကိုကူညီတတ်တဲ့ ဘင်္ဂလားဒေ့ရ်ှရဲ့သဘာဝဖြစ်ပါတယ်လို့ ဘင်္ဂလားဒေ့ရှ် နိုင်ငံခြားရေးဝန်ကြီး မိုဟာမက်အလီက အမေရိကန်ပြည်ထောင်စုမှာပြုလုပ်တဲ့ ဘာသာရေးလွတ်လပ်ခွင့်ဆိုင်ရာ ဝန်ကြီးများအစည်း အဝေးမှာ ပြောလိုက်ပါတယ်။
အဲဒီအစည်းအဝေးကို တက်ရောက်ဖို့ မိုဟာမက်အလီကို အမေရိကန်နိုင်ငံခြားရေးဝန်ကြီး မိုက်ပွန်ပီရို က ဖိတ်ကြားခဲ့တာပါ။
နိုင်ငံတကာအသိုင်းအဝိုင်းအနေနဲ့ မြန်မာဒုက္ခသည်တွေ အန္တရာယ်ကင်းပြီး သိက္ခာရှိစွာ နေရပ်ပြန်နိုင်ရေးအတွက် ဆက်လက်ဖိအားပေးဖို့လိုတယ်လို့လည်း ပြောပါသေးတယ်။
အမေရိကန်ဒုတိယသမ္မတ မိုက်ကယ်ပန့်စ်ကတော့ အမေရိကန်ဟာ ဘာသာရေးလွတ်လပ်မှုနဲ့ လွတ်လပ်စွာ ယုံကြည်ခွင့်ကို သူ့ရဲ့နိုင်ငံခြားရေးမူဝါဒရဲ့ ထိပ်ဆုံးမှာထားတဲ့နိုင်ငံဖြစ်ပါတယ်လို့ ပြောပါတယ်။
အစည်းအဝေးအတွင်း အမေရိကန်ပြည်ထောင်စုဆိုင်ရာ ကုလသမဂ္ဂသံအမတ်ကြီးနစ်ကီဟေလီက ရိုဟင်ဂျာပြဿနာနဲ့ပတ်သက်ပြီး ဘင်္ဂလားဒေ့ရ်ှရဲ့ လူသားချင်းစာနာကူညီမှုတွေကို ကျေးဇူးတင်ကြောင်းနဲ့ နိုင်ငံတကာအဖွဲ့အစည်းတွေကို ဘင်္ဂလားဒေ့ရ်ှနိုင်ငံထဲဝင်ပြီး ရိုဟင်ဂျာဒုက္ခသည်တွေကို ကူညီဖို့ခွင့်ပေးခဲ့တဲ့ အတွက်လည်း ကျေးဇူးတင်တဲ့အကြောင်း ပြောခဲ့တယ်လို့ ဝါရှင်တန်ဒီစီမှာရှိတဲ့ ဘင်္ဂလားဒေ့ရ်ှနိုင်ငံသံရုံးက ပြောပါတယ်။