21 July 2018
 |
| ကေအိုင်အေ တပ်သားနှစ်ဦးကို လိုင်ဇာအနီးတွေ့ရစဉ်။ ကေအိုင်အေသည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးစာချုပ်ကို လက်မှတ်မထိုးထားသော အဖွဲ့တစ်ဖွဲ့ ဖြစ်သည်။ (ဓာတ်ပုံ - ရိုက်တာ) |
တိုက်ပွဲ၏အစသည် ကေအိုင်အေ တပ်မဟာ (၉)၊ တပ်ရင်း (၆) ထိန်းချုပ်ရာ အဆိုပါဒေသတွင် တပ်စွဲထားသည့် စခန်းများကို မြန်မာ့တပ်မတော်က ထိုးစစ်ဆင်ခြင်းကြောင့်ဖြစ်ကြောင်း ကေအိုင်အေ ပြောခွင့်ရအရာရှိကဆိုသည်။
“တပ်မတော်ဘက်ကတော့ အင်အားတွေလည်း တိုးထားတယ်၊ လက်နက်ကြီးတွေလည်း သုံးတယ်။” ဟု သူက ပြောသည်။
ယနေ့ နံနက် ၇ နာရီခန့်မှ စတင်ပြီး ပိုမိုပြင်းထန်လာသော တိုက်ပွဲကြောင့် နှစ်ဖက်အကြား သေကြေဒဏ်ရာ ရမှုများလည်းရှိခဲ့ကြောင်း အဆိုပါ ကေအိုင်အေ စစ်အရာရှိကပြောသည်။
တိုက်ပွဲသတင်းကို ဖားကန့်မြို့နယ် အထွေထွေအုပ်ချုပ်ရေးမှူး ကလည်း အတည်ပြုခဲ့ပြီး နှစ်ဖက်တပ်သားများသည် ကျေးရွာများနှင့် အလှမ်းဝေးသည့် ဖားကန့်မြို့နယ်၏ အရှေ့မြောက်ဘက် ဆယ်မိုင်ခန့်အကွာ ဂျာရာယာန်ဒေသ၊ ဘွန်ဂျန်တောင်အနီးတွင် တိုက်ခိုက်နေသည်ဟုဆိုသည်။
“အခုအထိတော့ စစ်ရှောင်တွေရှိတယ်ဆိုတာမကြားရသေးပါဘူး။ ကျေးရွာတွေနဲ့နီးရင်လည်း အုပ်ချုပ်ရေးအဖွဲ့တွေက လှမ်းသတင်းပို့ပါလိမ့်မယ် ” ဟု ဖားကန့်အုပ်ချုပ်ရေးမှူး ဦးကျော်စွာအောင်ကပြောသည်။
တစ်ပတ်နီးပါးကြာပြီဖြစ်သည့် အဆိုပါတိုက်ပွဲနှင့်ပတ်သက်ပြီး တပ်မတော်ဘက်က တစ်စုံတစ်ရာ သတင်းထုတ်ပြန်ခြင်းမရှိသေးပါ။
တိုက်ပွဲအခြေအနေနှင့် ပတ်သက်၍ တပ်မတော်သတင်းမှန်ပြန်ကြားရေးအရာရှိများထံ ဆက်သွယ်ခဲ့သော်လည်း အဆက်အသွယ်မရခဲ့ပါ။
တပ်မတော်နှင့် ကေအိုင်အေ တို့အကြား ၁၉၉၄ ခုနှစ်မှ စတင်သည့် ၁၇ နှစ်ကြာ ငြိမ်းချမ်းရေးပျက်ပြားသွားပြီးနောက် ကချင်ပြည်နယ်အနှံ့အပြားတွင် တိုက်ပွဲများပြင်းထန်စွာဖြစ်ပွားလာခဲ့ပြီး စစ်ဘေးရှောင်အရေအတွက်လည်း တစ်သိန်းကျော်အထိရှိလာခဲ့သည်။
ငြိမ်းချမ်းရေးအတွက် နေပြည်တော်တွင် အစိုးရ၊ တပ်မတော်နှင့် ကေအိုင်အေ ခေါင်းဆောင်များ တွေ့ဆုံနေသည့် တစ်ချိန်တည်းတွင် တိုက်ပွဲဖြစ်ပွားနေသည့်အခြေအနေကို နှစ်ဖက်ခေါင်းဆောင်များ အမြန်ဆွေးနွေး သင့်ကြောင်း ကချင်ပြည်နယ် အမျိုးသားလွှတ်တော်မဲဆန္ဒနယ် (၉) မှ လွှတ်တော်အမတ် ဦးခင်မောင်မြင့်က သုံးသပ်သည်။
ရေးသားသူ - အောင်ငြိမ်းချမ်း/ Myanmar Now 20/07/2018
Comments
Post a Comment