ဗြိတိန်နိုင်ငံအခြေစိုက် Global Witness အဖွဲ့ကတော့ ဖွင့်ချလိုက်ပြီဗျာ။ ဘာတဲ့ ဦးသန်းရွှေမိသားစု၊ ပြည်ထောင်စုဝန်ကြီး ဦးအုန်းမြင့်၊ တပ်မတော်ပိုင် မြန်မာ့စီးပွာရေးဦးပိုင် လီမိတက်၊ ခရိုနီပိုင် ကုမ္ပဏီတွေနဲ့ မူးယစ်ဂိုဏ်းချုပ်ကြီးတွေက မြန်မာနိုင်ငံရဲ့ ကျောက်မျက်လောကကိုပါ ထိန်းချုပ်ထားသတဲ့ဗျာ။
အဲဒီအပေါင်းအပါတွေ မြန်မာနိုင်ငံက ကျောက်စိမ်းတွေကို တရုတ်ပြည်ဘက်ပို့နေကြတာ ၂၀၁၄ ခုနှစ် တစ်နှစ် တည်းမှာတင် အမေရိကန် ဒေါ်လာ ၁၂ ဘီလီယံ ရှိသတဲ့။ အလိုလေး တိုင်းပြည်ကို ၁၉၈၈ ခုနှစ်ကတည်းက ဖြတ်လိုက်ရင် နှစ်ပေါင်း ၂၀ ကျော် ပြည်တွင်းကခိုးထုတ်ပြီး တရုတ်နဲ့ အလုပ်လုပ်နေတာ ဘယ်လောက်တောင် ရှိသွားပြီလဲ။ မြန်မာနိုင်ငံဆင်းရဲ၊ ပြည်သူတွေမွဲ၊ အကြွေးတွေတင်၊ ကျွန်တွေဖြစ်၊ လူတစ်စုကတော့ ပိုက်ဆံတွေ ထားစရာ နေရာမရှိလောက်အောင်ဖြစ်နေတာ ဘာကြောင့်လဲဆိုတဲ့ အကွက်တစ်ကွက် ပေါ်ထွက်လာပြီခင်ဗျ။
Global Witness အဖွဲ့က ကျောက်စိမ်းဟာ မြန်မာနိုင်ငံရဲ့ ကြီးမားတဲ့ နိုင်ငံတော် လျှို့ဝှက်ချက်လို့ ချက်ကောင်း ကို တစ်ချက်တည်းပစ်သွင်းလိုက်တာပဲ။ ဒီရိုက်ချက်ဟာ “တရုတ်ကိုလည်း ကြောက်နေရပါတယ်” ဆိုတဲ့ အဖြေ လည်းဖြစ်သပေါ့။ တရုတ်ဘက်ကို မော်မကြည့်ရဲပါဘူး၊ တရုတ်တွေ လုပ်သမျှ ဟုတ်ပါ့၊ မှန်ပါ့လုပ်နေတာ တိုင်းပြည်အတွက်လား၊ လူတစ်စုကောင်းစားဖို့လား ထင်ရှားနေပါပြီဗျာ။
ကျောက်စိမ်းရောင်းလို့ရတဲ့ ငွေတွေကို သူတို့ဘာတွေလုပ်နေကြသလဲ။ သူတို့ဘဝ အာဏာတည်မြဲရေး လုပ်နေကြတာဗျ။ အာဏာတည်မြဲနေမှ မြန်မာနိုင်ငံကို ဒီ့ထက်ပိုပြီး အရိုးတောင်မကျန်အောင် စုပ်ဝါး ပျက်သုဉ်းရေးကို ဘယ်သူတွေ လုပ်နေကြသလဲဗျာ။
ကျုပ်တို့ မဆင်းဘူး၊ ကျုပ်တို့ မပြောင်းဘူး၊ ကျုပ်တို့ပဲ အာဏာဆက်ရစေရမယ်လို့ ကျောထောက်နောက်ခံ တွေကို ခိုင်မာအောင်လုပ်၊ ပါတီတွေထောင်၊ အာဏာပြောင်ပြောင်တင်းတင်းရအောင် ဓားပြတိုက်နေကြတာ ဘယ်သူတွေများလဲဗျာ။
မြင်အောင်ကြည့်ကြပါ။ စဉ်းစားဆင်ခြင်ကြည့်ကြပါ။ တစ်တိုင်းပြည်လုံး မွဲပြာကျနေချိန်မှာ တိုးတက်အောင် ဆက်ပြီး ကြံဆောင်ဦးမယ်ဆိုတဲ့ လူတွေဟာ “မြန်မာ” ဆိုတဲ့ နိုင်ငံသူ နိုင်ငံသား တိုင်းသူပြည်သား အားလုံး အတွက်လား သူတို့အုပ်စုနဲ့ ခရိုနီတွေအပါအဝင် မူးယစ်ရာဇာတွေအတွက်လား မြင်ပြီလားဗျာ။
ဟုတ်ကဲ့ … ခင်ဗျားတို့ကို ဂုတ်သွေးစုပ်မယ့်သူတွေ၊ ခင်ဗျားတို့ ပခုံးပေါ်ကို ထမ်းပိုးဆက်တပ်မယ့်သူတွေ၊ ခင်ဗျားတို့ ခြေထောက် သံခြေချင်းခတ်မယ့်သူတွေ၊ ခင်ဗျားတို့ သားသမီးတွေရဲ့ အနာဂတ်တွေကို ဆက်ပြီး မတွေးခေါ်နိုင်တဲ့ ခပ်တုံးတုံးသူတွေဖြစ်အောင်လုပ်မယ့်သူတွေကို နောက်တစ်ကြိမ် ပြန်ပြီး တိုင်းပြည်ကို အုပ်ချုပ်ပါလို့ ပြောသူတွေ ထောက်ခံသူတွေဟာ သူခိုးကို ဓားရိုးကမ်းတဲ့ အဆိုးဆုံးသူတွေ ဖြစ်တော့မယ် ဆိုတာ သတိထားကြပါဗျာ။
၂၄.၁၀.၂၀၁၅
Photh Credit, http://www.nytimes.com/
Comments
Post a Comment