တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင် အနားယူဖွယ်ရှိ
သတင်း – ရဲဝင်းနောင်/စိုင်းခန့်ဇင် (ရွှေတြိဂံ)
တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင် အနားယူ မယူဆိုတဲ့ ကိစ္စနဲ့ပတ်သက်ပြီး တပ်မတော် အနေနဲ့ အခြေခံဥပဒေ ပြဌာန်းချက်များကို ကျော်လွန်လုပ်ဆောင်မှာ မဟုတ်ကြောင်း ဗိုလ်မှူးချုပ် ဇော်မင်းထွန်းက ပြောကြား ပါတယ်။
တပ်မတော် သတင်းမှန်ပြန်ကြားရေး အဖွဲ့ခေါင်းဆောင် ဗိုလ်မှူးချုပ် ဇော်မင်းထွန်းက နိုင်ဝင်ဘာလ ၂၇ ရက် နေပြည်တော် စစ်သမိုင်းပြတိုက်မှာ ပြုလုပ်တဲ့ သတင်းစာ ရှင်းလင်းပွဲမှာ ပြောကြားခြင်း ဖြစ်ပါတယ်။
ဗိုလ်မှူးချုပ် ဇော်မင်းထွန်းက ဗိုလ်ချုပ်မှူးကြီး မင်းအောင်လှိုင် အနားယူမယူနဲ့ ပတ်သက်ပြီး သတင်းထောက်များရဲ့ မေးမြန်း မှုကို ပြန်လည် ဖြေကြားရာမှာ ဥပဒေအတိုင်း ဖြစ်မယ်လို့သာ ဖြေကြားခဲ့ပြီး အတိအကျ အနားယူပါမယ် ဆိုတာကို ဖြေကြားခြင်း မရှိတာ တွေ့ရှိရပါတယ်။
“၂၀၂၁ ထဲမှာ ပြည့်မှာ ဟုတ်ပါတယ်။ သူ့ဥပဒေ အတိုင်းပဲ ဖြစ်မှာပါ။ မှန်ပါတယ်”လို့ ဗိုလ်မှူးချုပ် ဇော်မင်းထွန်းက ဖြေကြား ပါတယ်။
ဗိုလ်ချုပ်မှူးကြီး မင်းအောင်လှိုင်(ဓာတ်ပုံ – တပ်မတော် သတင်းမှန် ပြန်ကြားရေး အဖွဲ့၊ seniorgeneralminaunghlaing.com)
၂၀၂၀ ရွေးကောက်ပွဲမှာ အမျိုးသား ဒီမိုကရေစီ အဖွဲ့ ချုပ်(NLD) အစိုးရ ထပ်မံ အနိုင်ရတဲ့အတွက် လာမယ့်နှစ် ဧပြီလမှာ အသက် ၆၅ နှစ်ပြည့်တော့မယ့် တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင် အနားယူ မယူ ဆိုတဲ့ သတင်းထောက်တွေရဲ့ မေးခွန်းတွေအပေါ် အထက်ပါအတိုင်း တုံ့ပြန်ဖြေကြားခဲ့တာ ဖြစ်ပါတယ်။
အဲဒီအပြင် တပ်မတော် ကာကွယ်ရေး ဦးစီးချုပ် အသစ်က ဘယ်လိုလူမျိုး ဖြစ်မှာလဲဆိုတဲ့ မေးခွန်းကိုလည်း “တပ်မတော် မှာတော့ ကျနော်တို့ကတော့ ဆင့်ကဲတာဝန်ယူမှု၊ တာဝန်ခံမှုစနစ် ရှိတယ်။ ဒီရာထူးတိုးမြှင့်ရေးတို့နဲ့ ပတ်သက်လို့ကျတော့ သူ့ရဲ့ တိကျတဲ့မူဝါဒတွေက ကျနော်တို့ ရှိပြီးဖြစ်ပါတယ်။ ဒီအချိန်မှာတော့ ဘယ်လိုလူမျိုး ဖြစ်မယ်ဆိုတာ ကျနော်တို့လည်း မပြောနိုင်သေးပါဘူး။ ဒီ စနစ်၊ စည်းကမ်းတွေနဲ့သာ သွားပါလိမ့်မယ်”လို့ ဗိုလ်မှူးချုပ် ဇော်မင်းထွန်းက ဖြေကြားပါတယ်။
တပ်မတော် သတင်းစာ ရှင်းလင်းပွဲမှာ တွေ့ရတဲ့ ဗိုလ်မှူးချုပ် ဇော်မင်းထွန်း(ဓာတ်ပုံ – တပ်မတော် သတင်းမှန် ပြန်ကြားရေး အဖွဲ့၊ seniorgeneralminaunghlaing.com)
၂၀၂၀ ပြည့်နှစ် နိုဝင်ဘာလဆန်းပိုင်းမှာ လုပ်ခဲ့တဲ့ ဂျပန်သတင်းစာ အဆာဟိရှင်ဘွန်းနဲ့ အင်တာဗျူးမှာလည်း ဗိုလ်ချုပ်မှူးကြီး အနေနဲ့ လာမယ့်နှစ်မှာ အနားယူ မယူနဲ့ နိုင်ငံရေး လုပ်မလုပ်ဆိုတဲ့ မေးခွန်းကို တိတိကျကျ ဖြေဆိုခြင်း မရှိခဲ့ပါဘူး။
အဲဒီ အင်တာဗျူးမှာ ဗိုလ်ချုပ်မှူးကြီးက“ကျနော့်ရဲ့ အတွေ့အကြုံများကို နိုင်ငံတော်နဲ့ ပြည်သူအတွက် ဆောင်ရွက် ကြိုးပမ်း ပေးပါမယ်။ ဖွဲ့စည်းပုံ အခြေခံဥပဒေအရ ပေးအပ်ထားတဲ့ နိုင်ငံသား အခွင့်အရေးနဲ့အညီ နိုင်ငံတော်ရဲ့ အခြေအနေပေါ် မူတည်ပြီး လုပ်ဆောင်မှာ ဖြစ်ပါတယ်”လို့ ပြောဆိုခဲ့ပါတယ်။
ဗိုလ်ချုပ်မှူးကြီးဟာ ၂၀၁၆ ခုနှစ်က အသက် ၆၀ ပြည့်ခဲ့ပေမယ့် ပင်စင် မယူဘဲ တပ်မတော် ဥပဒေများအရ ရာထူး သက်တမ်း တိုးထားခဲ့တာဖြစ်ပြီး အဲဒီလို ၅ နှစ်သက်တမ်း တိုးထားမှုဟာ လာမယ့် ၂၀၂၁ ခုနှစ် ဧပြီလမှာ သက်တမ်း ကုန်ဆုံးမှာဖြစ်ကြောင်း သိရပါတယ်။
ဗိုလ်ချုပ်မှူးကြီး မင်းအောင်လှိုင်(ဓာတ်ပုံ – တပ်မတော် သတင်းမှန် ပြန်ကြားရေး အဖွဲ့၊ seniorgeneralminaunghlaing.com)
Comments
Post a Comment