"ဝန်ကြီးများရုံး နောက်ကွယ်က အရှုပ်တော်ပုံ"

"ဝန်ကြီးများရုံး နောက်ကွယ်က အရှုပ်တော်ပုံ"

ယနေ့ လူမှုကွန်ယက်မှာ ဝေဖန်မှု အများဆုံး
ဖြစ်နေတဲ့ ဝန်ကြီးများရုံးမှာ အနှိပ်ခန်း တည်ဆောက်တာနဲ့
ပတ်သက်ပြီး လွဲနေတာလေးတွေ နဲနဲဝင်တည့်ပေးပါ့မယ်
ဒီအကြောင်းကို မပြောခင် သမိုင်းဝင် ဝန်ကြီးများရုံးရဲ့ သမိုင်းကို အနည်းငယ် ပြောပါရစေ။

ဝန်ကြီးများရုံးကို ကိုလိုနီခေတ်မှာ အင်္ဂလိပ် အစိုးရက
မြန်မာတစ်နိုင်ငံလုံးကို ၁၈၈၆ ခုနှစ်မှာ သိမ်းယူအပြီး
များပြားလာတဲ့ စီမံခန့်ခွဲမှုတွေအတွက် ယခင်က
အသုံးပြုနေတဲ့ ကမ်းနားလမ်းပေါ်က ဝန်ကြီးများရုံးအစား
ရုံးသစ်တစ်ခုကို ဆောက်လုပ်ဖို့အတွက် မြေအကျယ်
၁၆ ဧက ပေါ်မှာ အင်္ဂလိပ်လူမျိုး အင်ဂျင်နီယာ ဟင်နရီ
ဟွိုင်ဖောက်စ်က ဒီဇိုင်းရေးဆွဲပေးပြီး ၁၈၉ဝ ပြည့်နှစ်၊ ဇန်နဝါရီလမှာ အုတ်အနီနဲ့ အုတ်အဝါရောင် နှစ်မျိုးသုံးပြီး
စတင်ဆောက်လုပ်ခဲ့ပါတယ်။

အဆောက်အဦး ဆောက်လုပ်မှုကို ၁၉၀၂ နှစ်မှာ ပြီးစီးခဲ့ပြီး
အဲ့ဒီ့ခေတ်က ကျပ်ငွေ ၂.၅ သန်း ကုန်ကျခဲ့ပါတယ်။
အဲ့ဒီ့အချိန်မှာ ခေါ်တဲ့အမည်ကတော့ အတွင်းဝန်များရုံးပါ။

ဘာကြောင့် သမိုင်းဝင်ခဲ့ရတာလဲ ...

ဝန်ကြီးများရုံးကို ရောက်ခဲ့ဖူးတဲ့သူတွေ မဆိုထားနဲ့
ဝန်ကြီးများရုံးဆိုတဲ့ အမည်ကိုကြားရုံနဲ့တင် ကျတော်တို့
မြန်မာလူမျိုးတွေ ရင်ထဲမှာ နင့်နေအောင် ခံစားခဲ့ရဖူးပါတယ်
ဘာကြောင့်လဲဆိုတော့ ဒီအဆောက်အအုံကြီးဟာ
ကျတော်တို့ မြန်မာနိုင်ငံရဲ့ အထင်ကရ သမိုင်းတွေနဲ့
ပြည့်နေတဲ့ နေရာကြီး တစ်ခုဖြစ်နေလို့ပါပဲ

ဒီအဆောက်အဦးကြီးမှာ
- ပထမဆုံး မြန်မာ့လွှတ်တော် အစည်းအဝေးတွေကို ၁၉၃၆
ခုနှစ်မှနေ ၁၉၆၂ ခုနှစ်အထိ ကျင်းပပြုလုပ်ခဲ့တဲ့ နေရာ
- မြန်မာနိုင်ငံအတွက် ၁၉၄၇ ဖွဲ့စည်းပုံအခြေခံ
ဥပဒေကို ဗိုလ်ချုပ်တို့ မူကြမ်းရေးဆွဲခဲ့တဲ့နေရာ
- ဗိုလ်ချုပ်အောင်ဆန်းကိုယ်တိုင် ဝန်ကြီးအဖြစ်နဲ့
ရုံးထိုင်ခဲ့ပြီး လွတ်လပ်ရေးရဖို့ ကြိုးပမ်းခဲ့တဲ့နေရာ
- မြန်မာနိုင်ငံရဲ့ လွတ်လပ်ရေး ဖခင် ဗိုလ်ချုပ်အောင်ဆန်းနဲ့
အာဇာနည်ကြီးတွေ ကျဆုံးခဲ့တဲ့နေရာ
- မြန်မာနိုင်ငံရဲ့ ပထမဆုံး လွတ်လပ်ရေး အခမ်းအနား
ကျင်းပတဲ့ နေရာ
- မြန်မာနိုင်ငံရဲ့ ပထမဆုံး မြန်မာနိုင်ငံအလံတော်ကို
လွှင့်ထူခဲ့တဲ့ နေရာ
စတဲ့ အချက်တွေကြောင့် ဒီအဆောက်အဦးကြီးရဲ့ တန်ဖိုးက
ကျတော်တို့ မြန်မာနိုင်ငံသား အားလုံးအတွက်တော့
အဖိုးမဖြတ်နိုင်အောင်ကို ကြီးကျယ်မြင့်မားလှပါတယ်။

သမိုင်းဝင် အဆောက်အဦးကို လေလံတင်ကြပြီ

နဝတ စစ်အစိုးရ အုပ်ချုပ်ချိန်မှ စပြီး ဝန်ကြီးများရုံးကို
ပြည်သူတွေ လာရောက်လေ့လာ ကြည့်ရှုခွင့်ကို လုံးဝ
ပိတ်ပင်လိုက်ပါတယ်။ ဝန်ကြီးများရုံးကို သံဆူးကြိုးတွေနဲ့
ခြံဝန်းခတ်လိုက်ပြီး စစ်တပ်အစောင့်အရှောက်နဲ့
ထားကာ ရန်ကုန်မြို့လည်ခေါင်က အကျဉ်းထောင်တစ်ခုလို
ဖန်တီးထားခဲ့ကြပါတယ်။

၂၀၀၅ ခုနှစ်မှာ နေပြည်တော်ကို တည်ဆောက်ပြီး အစိုးရအဖွဲ့ ရန်ကုန်မှနေ နေပြည်တော်ဆီကို ပြောင်းလဲ
ရုံးစိုက်ကြချိန်မှာတော့ ဝန်ကြီးများရုံးဟာ ပြုပြင်သူမရှိစောင့်ရှောက်သူမရှိတော့ပဲ အထီးကျန်ခဲ့ပါတယ်။
ကံဆိုးမသွားရာ မိုးလိုက်ရွာဆိုသလိုပဲ ၂၀၀၈ ခုနှစ်
နာဂစ်မုန်တိုင်း အပြီးမှာတော့ ဝန်ကြီးများရုံးဟာ
ဂျုံးဂျုံးကျခဲ့ပါတော့တယ်။

ဦးသိန်းစိန် အစိုးရ တက်လာပြီးချိန်မှာတော့ ၂၀၁၂ ခုနှစ်မှာ
ဝန်ကြီးများရုံးရဲ့ ပိတ်ထားတဲ့ ဂိတ်တံခါးကြီးကို အများ
ပြည်သူ လေ့လာနိုင်ဖို့ဆိုပြီး အာဇာနည်နေ့ တစ်ရက်ထဲသာ
ဖွင့်ပေးလိုက်ပါတယ်။ ပြည်သူတွေက ဝန်ကြီးများရုံးကို
ဘယ်လောက်ချစ်လဲဆိုရင် စတင်ခွင့်ပြုတဲ့ နံနက် ၉ နာရီကနေ ညနေ ၅ နာရီအထိကို ဝင်ခွင့်ရဖို့ တန်းစီခဲ့ကြတဲ့
လူတန်းရှည်ကြီးဟာ မျက်စိတစ်ဆုံးပါပဲ။ တစ်နေကုန်အောင်
နေပူထဲမှာ တန်းစီကြရင်း မူးမေ့လဲခဲ့သူတွေတောင်
ရှိခဲ့ပါသေးတယ်။ နောက်နေ့မှာတော့ ဝင်းတံခါးကြီးကို
ပြန်ပိတ်ထားလိုက်ကြပါတယ်။

ဦးသိန်းစိန် အစိုးရက အမိုးတွေလန်၊ ဆေးရောင်တွေ
ပျယ်လွင့်နေပြီး မြက်ရိုင်းတောကြီးထဲက အကျဉ်းထောင်
ကြီးတစ်ခုလို ဖြစ်နေတဲ့ ဝန်ကြီးများရုံးကို ထူးခြားတဲ့ရအပြောင်းအလဲတစ်ခုကို ၂၀၁၄ မှာ လုပ်ခဲ့ပါတယ်။
အဲ့ဒါကတော့ ဝန်ကြီးများရုံးကို စီးပွားရေး လုပ်ငန်းရှင်
တွေထံ ဦးစိုးသိမ်းတို့ရဲ့ MIC က နိုင်ငံပိုင် ပြည်သူပိုင်
အဆောက်အဦးတွေကို ပုဂ္ဂလိကပိုင်ပြုရေး စီမံချက်နဲ့
လေလံပစ်ခဲ့တာပါပဲ။

"ကျားကြောက်လို့ ရှင်ကြီးကိုး ရှင်ကြီးကျားထက်ဆိုး"

ဝန်ကြီးများရုံးကို လေလံအောင်ခဲ့တဲ့ ကုမ္ပဏီကတော့
အနုပညာရှင်တွေနဲ့ စစ်ဗိုလ်ချုပ် သားသမီးတွေ ပိုင်ဆိုင်တဲ့
အနော်မာ ကုမ္ပဏီပါပဲ။ ရန်ကုန်တိုင်း ဝန်ကြီးချုပ်ဟောင်း
ဦးမြင့်ဆွေ ရဲ့ခွင့်ပြုချက်နဲ့ ၂၀၁၅ ခုနှစ်မှာ အနော်မာ ကုမ္ပဏီ
ကဝန်ကြီးများရုံးကို ပြတိုက်ပြုလုပ်ခွင့်နှင့် ဝန်ဆောင်မှု
လုပ်ငန်းများ ဆောင်ရွက်ရန် နှစ် ၃၀ စာချုပ်နဲ့ ၂၀၄၅ ခုနှစ်အထိ ငှားရမ်းခွင့် ရခဲ့ပါတယ်။ စာချုပ်မှာ ပါဝင်တဲ့ အချက်
အချို့ကတော့ အနော်မာ ကုမ္ပဏီမှ ပြင်ဆင်သူမရှိတဲ့
ဝန်ကြီးများရုံးကို ငွေကြေးစိုက်ထုတ်ပြီး အများပြည်သူ
လေ့လာနိုင်တဲ့ ပြတိုက်ဖြစ်အောင် ပြင်ဆင်ရမယ်။

ပြတိုက်နဲ့ မဆိုင်တဲ့ အဆောက်အဦး အချို့ကို အနော်မာ
ကုမ္ပဏီက ရုံးခန်းဖြစ်စေ၊ စားသောက်ဆိုင်ဖြစ်စေ၊
စျေးဆိုင်ဖြစ်စေ၊ အနုပညာပြခန်းဖြစ်စေ ငှားရမ်းနိုင်ခွင့်
ရှိရမယ်လို့ ပါပါတယ်။
အနော်မာ ကုမ္ပဏီဟာ ဝန်ကြီးများရုံးကို လေလံ
အောင်ပြီးတာနဲ့ ပထမဆုံး လုပ်တဲ့အလုပ်ကတော့
ရှယ်ယာရှင်တွေထဲက တစ်ဦးဖြစ်တဲ့ ဗိုလ်ချုပ်ထွန်းကြည်ရဲ့
သမီး သီသီထွန်းရဲ့ မွေးနေ့ပွဲကို စစ်ဗိုလ်ချုပ် အသိုင်းအဝိုင်း၊
အနုပညာရှင် အချို့တို့နဲ့အတူ မွေးနေ့ပါတီကို ကျင်းပခဲ့ကြ
ပါတယ်။ ဒီပွဲက ပုံတွေကို အေးနေဝင်းက သူ့ရဲ့ဖေ့ဘုတ်မှာ
တင်ရာကနေ ပြည်သူလူထုက သိရှိပြီး ယမ်းပုံမီးကျ
ဒေါသထွက်ခဲ့ကြပြီး ဦးသိန်းစိန် အစိုးရကို ဝိုင်းဆဲခဲ့ကြ
ပါတယ်။

ဦးသိန်းစိန် အစိုးရ အဆဲခံရချိန်မှာ ရှေ့ကထွက်လာတဲ့
သူကတော့ ဖျာဝန် ဦးရဲထွဋ်ပဲ ဖြစ်ပါတယ်။ အဲ့ဒီ့အချိန်မှာ
ဦးရဲထွဋ်က ဖေ့ဘုတ်မှာ ပါတီပွဲက ပုံတွေနဲ့အတူ
စာတစ်ကြောင်းတင်လိုက်တယ်။
"ဒီလုပ်ရပ်အတွက် ကိုသန်းမြင့်ဦးတို့ YMT အနေနဲ့
ပြန်သုံးသပ်သင့်တယ်လို့ ထင်ပါတယ်" တဲ့
သူက အဲ့ဒီ့လို ရေးလိုက်တဲ့ အခါမှာ ပြည်သူလူထုရဲ့
ဒေါသက ဒေါက်တာသန်းမြင့်ဦးရဲ့ YHT ဆီကို
လှည့်သွားတယ်။ တကယ်တော့ ဒေါက်တာသန်းမြင့်ဦးရဲ့
YHT (Yangon Heritage Trust) ဆိုတာက
ရန်ကုန်မြို့ပြ အမွေအနှစ် ထိန်းသိမ်းစောင့်ရှောက်ရေး အဖွဲ့ပါ။

ဝန်ကြီးများရုံးကို လေလံအောင်ခဲ့တာက သူတို့အဖွဲ့က
မဟုတ်ပဲ အနော်မာ စီးပွားရေးအုပ်စုက အောင်ခဲ့တာသာ
ဖြစ်ပြီး YHT အနေနဲ့က အဆောက်အဦး ပြန်လည်
ပြင်ဆင်ရေးမှာ နည်းပညာဆိုင်ရာ အကြံပေးဖို့ အတွက်သာ
တာဝန်ယူထားတာ ဖြစ်ပါတယ်။ ဒါကို ပြန်ဝန်တာဝန်ယူထား
တဲ့သူက အနော်မာအုပ်စုကို ထည့်မပြောပဲ မဆိုင်တဲ့
YHT နဲ့ ပြည်သူကို ခေါင်းတည်ပေးလိုက်တဲ့ အတွက်
အချောင်အဆဲခံရတဲ့ ဒေါက်တာ သန်းမြင့်ဦးက
ပြန်ရှင်းခဲ့တဲ့အတွက် အဲ့ဒီအချိန်က ပြန်ဝန်ရာထူး ယူထားတဲ့
ဦးရဲထွဋ်တစ်ယောက် အရှက်ကွဲခဲ့ရပါတယ်။

ဒီအကြောင်း ရေးပြတာက ဝန်ကြီးများရုံးကို တင်ဒါအောင်
ထားတဲ့ အနော်မာ ကုမ္ပဏီနဲ့ ပတ်သက်ပြီး သူတို့အုပ်စုရဲ့
ယခင်ထဲက သဘောထားကို အများသိအောင် ပြောရခြင်းပဲ
ဖြစ်ပါတယ်။ ဒီအငြိုးကြောင့် တင်ဒါအောင်ခဲ့တဲ့ အနော်မာ
အုပ်စုက စာချုပ်ပါ စည်းမျဉ်းတွေကို အကောင်အထည်
မဖော်တော့ပဲ အဆောက်အဦး ပြင်ဆင်ခြင်းကို လက်ဖျားနဲ့
မထိပဲ အစိုးရသစ် တက်လာပြီး ၂၀၁၇ ခုနှစ်အထိ မပြုပြင်ပဲ
ပစ်ထားခဲ့ကြပါသေးတယ်။ ဒါပေမဲ့ ရန်ကုန်တိုင်း ဝန်ကြီးချုပ်သစ် ကွီးဖြိုးက ဝန်ကြီးများရုံးကို ၂၀၁၈
အာဇာနည်နေ့ အမှီ ၁၈ လအတွင်း အပြီးသတ် ပြင်ဆင်ဖို့
ညွှန်ကြားပြီး ၂၀၁၇ မှ စတင်ကာ ပြင်ဆင်ခဲ့ကြတာပဲ
ဖြစ်ပါတယ်။

ပြတိုက် အဖြစ် ပြင်ဆင်ပြီးချိန်မှာတော့ အနော်မာ
ကုမ္ပဏီက ပြတိုက်ဝင်ကြေးအဖြစ် လူကြီး ၃၀၀၀ ကျပ်၊
ကလေး ၁၀၀၀ ကျပ် ကောက်ခံပါတယ်။ အဓိက သမိုင်းဝင်
ပြခန်းတွေဖြစ်တဲ့ ဗိုလ်ချုပ်အောင်ဆန်းနှင့် အာဇာနည်
ခေါင်းဆောင်ကြီးများ လုပ်ကြံခံရသည့် အလယ်ထပ်ရှိ ကက်ဘိနက်ခန်း၊ ဝင်းအလယ်မှာရှိတဲ့ လူမျိုးစု လွှတ်တော် အဆောက်အအုံနှင့် အခြားသော သမိုင်းဝင်ရုံးခန်း နေရာ
တွေကို ပြတိုက်ပြခန်းများ အဖြစ် မူလလက်ရာအတိုင်း ပြန်လည် မွမ်းမံပြီး အများပြည်သူ ဝင်ရောက်ကြည့်ရှုနိုင်
အောင်ပြင်ဆင်ပေးခဲ့သလို ကော်ဖီဆိုင်၊ ပန်းချီပြခန်း၊
ယခု မနေ့တစ်နေ့ကမှ ဖွင့်လှစ်လိုက်တဲ့ အနှိပ်ခန်းတို့ကို
စာချုပ်ပါ စည်းမျဉ်းများအရ အနော်မာ ကုမ္ပဏီကပဲ
ငှားရမ်းလုပ်ကိုင်နေတာသာ ဖြစ်ပါတယ်။

သမိုင်းဝင် ဝန်ကြီးများရုံးကို ပြည်သူလူထုနဲ့ အရပ်သား
အစိုးရက ဆိုင်ရုံပဲ ဆိုင်ပါတော့တယ်။ မပိုင်တော့ပါဘူး။
ဝန်ကြီးများရုံးကို နှစ် ၃၀ စာချုပ်နဲ့ အနော်မာအုပ်စုကို
ငှားရမ်းခဲ့တဲ့ သမ္မတဟောင်း ဦးသိန်းစိန်၊ ရန်ကုန်တိုင်း
ဝန်ကြီးချုပ်ဟောင်း ဦးမြင့်ဆွေတို့ မသေသေးပါဘူး။
ဒီလောက်ဆို ဝန်ကြီးများရုံး အရှုပ်တော်ပုံရဲ့ အဓိက
တရားခံက ဘယ်သူတွေလဲဆိုတာ မြန်မာနိုင်ငံက
ပြည်သူလူထုအနေနဲ့ သဘောပေါက်မယ်လို့ ထင်ပါတယ်။

ဒီတော့ ဘာဆက်လုပ်သင့်လဲ ...
ဒီလို သမိုင်းဝင် အဆောက်အဦးအပေါ်မှာ ခုလို အနှိပ်ခန်း
ဖွင့်တဲ့အထိ ထင်ရာစိုင်းလာတဲ့ လုပ်ရပ်ကို ပြည်သူလူထုက
ဆက်လက်ဆန့်ကျင် ကန့်ကွက်မြဲ ကန့်ကွက်ကြပါ။
ရန်ကုန်တိုင်း လွှတ်တော်က မေးခွန်းမေးပေးပါ။ ရန်ကုန်တိုင်း ပြည်သူ့အစိုးရနဲ့ စည်ပင်က စာချုပ်ပါ
စည်းကမ်းချက်တွေကို ပြင်ဆင်နိုင်အောင် ကြိုးစားကြပါ။
ဒီလုပ်ရပ်အပေါ် အစိုးရ၊ လွှတ်တော်၊ ပြည်သူအားလုံးရ
တညီတညွတ်ထဲ ဆတ့်ကျင်ကြပါလို့ တိုက်တွန်းလိုက်ပါတယ်။

ကျတော် မြန်မာ့နိုင်ငံရေးကို လေ့လာနေသူ သက်သက်ပါ

ZN.H 🇦🇺
Via,
Nay Lin