ရခိုင်ပြည်နယ် မောင်တော ဒေသ အကြမ်းဖက်မှုတွေကို စစ်တပ်ဘက်က ကိုင်တွယ်တဲ့ နေရာမှာ အစိုးရရဲ့ အဆုံးအဖြတ်ကို ရယူဆောင်ရွက်ရတာ ဖြစ်တယ်လို့ တပ်မတော်ဘက်က ဒီကနေ့ ပြောဆိုလိုက်ပါတယ်။ ရခိုင်ပြည်နယ် မောင်တောဒေသ အကြမ်းဖက်မှုတွေကို ကိုင်တွယ်ဖို့ တပ်မတော်ဘက်က နိုင်ငံရဲ့ လုံခြုံရေးဆိုင်ရာ အမြင့်ဆုံးဖြစ်တဲ့ နိုင်ငံတော် ကာကွယ်ရေးနဲ့ လုံခြုံရေးကောင်စီ အစည်းအဝေး ခေါ်ယူလိုပေမယ့် အဓိက အဆုံးအဖြတ်ကတော့ သမ္မတ ပေါ်မှာ မူတည်တယ်လို့လည်း ပြောဆိုသွားပါတယ်။
"ကျနော်တို့တပ်မတော်ရဲ့အနေအထားပေါ့နော်၊ ကျနော်တို့တပ်မတော်ရဲ့အနေအထားကတော့ ကျနော်တို့ပြောသွားတဲ့အထဲမှာ ကျနော်တို့သည်နိုင်ငံတော်အစိုးရရဲ့ ကွပ်ကဲမှုအောက်မှာပဲ နိုင်ငံတော်အစိုးရနဲ့ ပူးပေါင်းဆောင်ရွက်ခြင်းဖြစ်ပါတယ်။ တခုခုလုပ်မယ်ဆိုရင်လည်း ကျနော်တို့သည် အဆုံးအဖြတ်ကိုယူရပါတယ် နိုင်ငံတော်အစိုးရကိုတင်ပြီး အဆုံးအဖြတ်ကိုယူရပါတယ်။ ဆိုတော့ ကျနော်တို့တပ်မတော်ပိုင်းကနေပြီးတော့မှ ကာကွယ်ရေးဝန်ကြီးတို့ ၊ တပ်မတော်ကာကွယ်ရေးဦးစီးချုပ်တို့ ဒုတိယတပ်မတော်ချုပ်တို့ ကလည်း နိုင်ငံတော်အစိုးရနဲ့ တွေ့တဲ့အခါမှာ ယခုရခိုင်ဖြစ်စဉ်နဲ့ ပတ်သက်ပြီးတော့မှ ဖြစ်နေတဲ့အနေအထားတွေ ၊ ပြီးသွားရင် ဖြစ်သင့်တဲ့အနေအထားတွေ ၊ ပြီးသွားတော့ ကျနော်တို့တပ်မတော်ဖြစ်ချင်တဲ့အနေအထားတွေ ဒီ၃ခုလုံး ကျနော်တို့ ဆွေးနွေးပါတယ်။
သာမန်အားဖြင့်တော့ ကျနော်တို့ ဖြစ်နေတဲ့အနေအထားကတော့ လက်ရှိအနေအထား ပါ။ ဒါကတော့ လူမှုကွန်ယက်မှာရော၊ printed media တွေမှာရော ကျနော်တို့အပေါ်မှာ မြင်နေတဲ့သဘောထားက ကာလုံရဲ့သဘောတရားမှာ တပ်မတော်က ၆ မဲပါတယ်၊ အရပ်ဘက်က ၅ မဲပါတယ်။ ကာလုံကိုခေါ်ပြီးတော့ ဆုံးဖြတ်မယ်ဆိုရင်တော့ တပ်မတော်လုပ်ချင်တာလုပ်မယ်ဆိုပြီးတော့ မြင်နေတာတွေအများကြီးရှိပါတယ်။ တကယ်ကတော့ ကျနော်တို့ ခုနကတင်ပြခဲ့သလိုပါပဲ၊ ဘယ်လိုပဲဆွေးနွေးဆွေးနွေးနောက်ဆုံးအဆုံးအဖြတ်ကတော့ သမ္မတကြီးရဲ့ အဆုံးအဖြတ်ပါပဲ။"
တပ်မတော် သတင်းမှန်ပြန်ကြားရေး အဖွဲ့ ဒုတိယ ဥက္ကဌ ဗိုလ်ချုပ်အောင်ရဲဝင်း ပြောဆိုခဲ့တာပါ။
ဒီကနေ့ နေပြည်တော်မှာ ပြုလုပ်တဲ့ တပ်မတော် သတင်းစာ ရှင်းလင်းပွဲမှာတော့ မြန်မာနိုင်ငံ အခြေစိုက် နိုင်ငံတကာ စစ်သံမှူးတွေ၊ သတင်းမီဒီယာတွေ တက်ရောက် မေးမြန်း ဆွေးနွေးခဲ့ပါတယ်။ မောင်တော ဒေသ အကြမ်းဖက်မှုတွေကို ကိုင်တွယ် ရှင်းလင်းတဲ့ နေရာမှာ တပ်မတော် အနေနဲ့ နယ်မြေ ဒေသ အခြေအနေကို ကြည့်ပြီး စစ်တပ်အင်အားနဲ့ ရဲတပ်ဖွဲ့ အင်အားကို အသုံးပြုနေတယ်လို့လည်း ပြောဆိုသွားပါတယ်။
နယ်မြေရှင်းလင်းရေး ဆောင်ရွက်ချက်တွေမှာ လုံခြုံရေး တပ်ဖွဲ့ဝင်တွေရဲ့ စစ်ဆေးမှုတွေကြောင့် ဒေသခံတွေ အနေနဲ့ မြန်မာ အစိုးရက အကြမ်းဖက် အဖွဲ့အဖြစ် ကြေညာထားတဲ့ ARSA -အဖွဲ့နဲ့ ပူးပေါင်းသွားတာမျိုးလည်း ဖြစ်နိုင်ကြောင်း နိုင်ငံတကာ စစ်သံမှူး တဦးက ဆွေးနွေးပါတယ်။ ဘင်္ဂလားဒေရှ့် နယ်စပ် မြန်မာဘက်ခြမ်းက အကြမ်းဖက်မှုတွေနဲ့ ပတ်သက်လို့ သတင်းအချက်အလက်တွေကို ဘင်္ဂလားဒေရှ့် အစိုးရကို မျှဝေပေးဖို့ကိုလည်း ဘင်္ဂလားဒေရှ့် စစ်သံမှူးက တောင်းဆိုပါတယ်။ ဒီကနေ့ နေပြည်တော် ဘုရင့်နောင် ရိပ်သာမှာ ပြုလုပ်တဲ့ ရခိုင် အကြမ်းဖက်မှု အရေး သတင်းစာ ရှင်းလင်းပွဲမှာတော့ တပ်မတော် သတင်းမှန် ပြန်ကြားရေး အဖွဲ့ ဥက္ကဌ ဗိုလ်ချုပ် စိုးနိုင်ဦး၊ ဒုတိယ ဥက္ကဌ ဗိုလ်ချုပ် အောင်ရဲဝင်းနဲ့ စစ်ဘက်ရေးရာနဲ့ လုံခြုံရေးဆိုင်ရာ ဒုတိယ အရာရှိချုပ် ဗိုလ်ချုပ် သန်းထွဋ်သိန်းတို့က ရှင်းလင်းခဲ့ကြပါတယ်။
ဗွီအိုအေ (မြန်မာပိုင်း)
Comments
Post a Comment