ပြည်နယ်တောင်းဆိုနေသည့် မျိုးနွယ်စု တိုင်းရင်းသားများအား ပြည်နယ်သစ် ပေးရန် အလျင်စလို စဉ်းစားပါက ယူဂိုဆလားဗီးယား ပြည်ထောင်စုကဲ့သို့ ကမ္ဘာ့မြေပုံမှ ပျောက်ကွယ်သွားလိမ့်မည်ဟု ဦးခွန်ထွန်းဦး သတိပေး

-------- ------- --------
( ကချင် ၊ ကရင် ၊ ရှမ်း စသဖြင့် ) ပြည်နယ်သတ်မှတ်ပြီးသား ပင်မ တိုင်းရင်းသား
မျိုးနွယ်စုများ၏ တန်းတူအခွင့်ရေးဆိုင်ရာ ကိစ္စများကို အရင်မစဉ်းစားဘဲ ပြည်နယ်
မရသေးသည့် တိုင်းရင်းသားများ၏ တောင်းဆိုမှုများကို ပြည်နယ်ပေးရန် အလျင်စလို
စဉ်းစားမည်ဆိုပါက မြန်မာပြည်သည် ယူဂိုဆလားဗီးယား ပြည်ထောင်စုကဲ့သို့
ကမ္ဘာ့မြေပုံမှ ပျောက်ကွယ်သွားလိမ့်မည်ဟု ရှမ်းတိုင်းတိုင်းရင်းသား ခေါင်းဆောင်
ဦးခွန်ထွန်းဦးက သတိပေး ပြောဆိုလိုက်သည်။

လတ်တလော ကျင်းပနေသော နေပြည်တော် ပြည်ထောင်စု ငြိမ်းချမ်းရေး ညီလာခံ
တွင် “၀” ၊ တအာင်းပလောင် ၊ ပအိုဝ်း စသည့် တိုင်းရင်းသားများ အပါအ၀င်
ပြည်နယ် မရရှိသေးသူများက ပြည်နယ်သတ်မှတ်ပေးရန် တောင်းဆိုမှုများ ရှိနေပြီး
အများစုမှာ သျှမ်းပြည်နယ်မှ တိုင်းရင်းသား မျိုးနွယ်စုများ ဖြစ်နေသည်။
"ခပ်ရှင်းရှင်း ပြောရရင်တော့ ပြည်နယ်ပေးလိုက်ရင် ယူဂိုဆလားဗီးယားလို
ဖြစ်နိုင်တယ်။ ယူဂိုဆလားဗီးယားလိုမျိုး မြန်မာပြည်မြေပုံ ပျောက်သွားမယ် " ဟု
ဦးခွန်ထွန်းဦးက လက်ရှိတောင်းဆိုနေမှုများ အပေါ် ရည်ညွှန်းပြောဆိုသည်။
ယူဂိုဆလားဗီးယား ပြည်ထောင်စုမှာ စစ်အေးခေတ်ကာလအထိ ဥရောပ ထိပ်သီး
နိုင်ငံတစ်နိုင်ငံအဖြစ် ရပ်တည်နိုင်ခဲ့သော်လည်း မျိုးနွယ်စုဆိုင်ရာ လက်နက်ကိုင်
ပြသ၁နာများ ၊ ဘေးပတ်ဝန်းကျင် နိုင်ငံများမှ ပထ၀ီနိုင်ငံရေးလွှမ်းမိုးမှု ၊ ပြည်နယ်
သတ်မှတ်ရေး ၊ ယင်းမှတစ်ဆင့် ခွဲထွက်ရေး တောင်းဆိုမှုများကို ကောင်းမွန်စွာ
ဖြေရှင်းနိုင်မှု မရှိသောကြောင့် ပြည်တွင်းစစ်နှင့်အတူ ဘော့စနီးယား ၊ ခရိုအေးရှား ၊
ကိုဆိုဗို ၊ ဆားဘီးယား ၊ မွန်တီနီဂရိုး စသည်ဖြင့် နိုင်ငံပေါင်းများ ကွဲထွက်သွားခဲ့ပြီး
ကမ္ဘာ့မြေပုံမှပါ ပျောက်ကွယ်သွားခဲ့ဖူးသည်။
သံလွင်မြစ် အရှေ့ဘက်ခြမ်းတစ်လျှောက် ပြည်နယ်တောင်းရန် ရည်ရွယ်ခဲ့ဖူးသည့် “၀” များအား ပြည်နယ်ပေးပါက တရုတ်သြဇာ လွှမ်းမိုးလွန်းသည့်အတွက်
သံလွင်မြစ် အရှေ့ဘက်ခြမ်း ၊ သျှမ်းပြည်နယ် အရှေ့ပိုင်း ဒေသတစ်ခုလုံးမှာ
ခရိုင်းမီးယားကဲ့သို့ ( ရုရှားနွယ်ဝင် လူမျိုးစုများများပြားသည့် ယူကရိန်းပိုင်ဒေသ ၊
လက်ရှိတွင် ရုရှားပိုင်ဖြစ်သွား ) ဖြစ်လိမ့်မည်ဟု ဦးခွန်ထွန်းဦးက ယခင်ကပင်
သတိပေး ပြောဆိုခဲ့သည်။
ညီလာခံ တက်ရောက်နေသည့် “၀” ဒီမိုကရက်တစ် ပါတီအနေဖြင့် သံလွင်
အရှေ့ခြမ်း ဒေသများအပြင် အနောက်ခြမ်းရှိ တန့်ယန်း ၊ လားရှိုး အစရှိသည့်
ဒေသများကိုပါ တောင်းဆိုမှုများ ရှိလာခဲ့သည်။
ယင်းအပြင် တိုက်ပွဲများ ပဋိပက္ခများမှာလည်း ရှိနေဆဲဖြစ်ပြီး တရုတ်သြဇာနှင့်
နီးစပ်သည့်အဖွဲ့များ ၊ တရုတ်မြန်မာနယ်စပ်အနီး မဲခေါင်မြစ်ဝှမ်းမှ ရှမ်းပြည်နယ်
အတွင်း ၀င်ထွက်နေသည့် မူးယစ်ဆေးဝါး နှင့် လက်နက် တရားမ၀င် ကုန်သွယ်မှု
များကလည်း မြန်မာ့ငြိမ်းချမ်းရေးကို ခြိမ်းခြောက်လာနေပြီး ယင်းကိစ္စများကို
ထိန်းသိမ်း ကြပ်မတ်ပေးရန် မြန်မာနိုင်ငံဆိုင်ရာ တရုတ်သံတမန်အား ဦးခွန်ထွန်းဦးက
မကြာသေးခင်ကပင် တိုက်တွန်းခဲ့ဖူးသည်။
ယင်းအပြင် ပအိုဝ်း ၊ တအာင်းပလောင် စသည့် အဖွဲ့အစည်းများကလည်း တအာင်း
ပလောင်နှင့် ပအိုဝ်းပြည်နယ် ရရှိရေးအတွက် လက်ရှိကျင်းပနေသည့် ညီလာခံတွင်
တောင်းဆိုနေကြပြီး တိုင်းလိုင်ရှမ်းနီများကလည်း ကချင်ပြည်နယ်နှင့် စစ်ကိုင်းတိုင်း
အထက်ပိုင်းရှိ ရှမ်းနီများနေထိုင်ရာ ဒေသများကို ပြည်နယ်သစ်အဖြစ်
သတ်မှတ်ပေးရန် တောင်းဆိုမှုများ ရှိနေသည်။
လေ့လာသူအချို့ကမူ ပင်လုံစာချုပ်တွင်ပါဝင်ခဲ့ပြီး နိုင်ငံထူထောင်သူများလည်း
ဖြစ်သည့် သျှမ်း ၊ ကချင် ၊ ချင်း စသည့် ပြည်နယ်ရရှိပြီးသား တိုင်းရင်းသားများ
အနေဖြင့် တန်းတူအခွင့်ရေးပင် မရသေးချိန်တွင် ကျန်တိုင်းရင်းသားများကို
ပြည်နယ်အသစ်များ သတ်မှတ်ပေးပါက ပိုမိုရှုပ်ထွေးမှုများ ဖြစ်စေမည်ဟု
မှတ်ချက်ပြုကြသည်။
"၂၀၀၈ ဖွဲ့စည်းပုံကိုလည်း ဒါကြောင့်ပဲ လက်မခံတာပဲ ။ဖွဲ့စည်းပုံကို ကြည့်လိုက်
ရှမ်းကို ဦးတည်ဆွဲထားတဲ့ ဖွဲ့စည်းပုံပဲ ၊ ရှမ်းကို ဦးတည်တိုက်ဖို့ ။ မပေးနဲ့
ပြောရမလား၊ ပေးလို့ပြောရမလား ၊ဒါကစစ်အစိုးရလုပ်သွားတာပဲ ၊ ကျွန်တေ်ာတို့
ဘယ်လိုရှင်းမလဲ။ ရှမ်းပြည်ကို ပေးတဲ့အတွက် ရှမ်းမို့လို့ ပြောတယ် ဖြစ်ဦးမယ်။
ဗမာပြည်မကို ခွဲပေးရင် ဗမာတွေ ဘယ်လိုနေမလဲ "ဟု ဦးခွန်ထွန်းဦးက
မေးခွန်းထုတ်သည်။
၂၀၀၈ ဖွဲ့စည်းပုံ အခြေခံဥပဒေအရ ကိုယ်ပိုင်အုပ်ချုပ်ခွင့်ရဒေသ နယ်မြေ ခြောက်
နေရာ အနက် ငါးနေရာမှာ ရှမ်းပြည်နယ်အတွင်းတွင် ရှိနေပြီး အစိုးရအုပ်ချုပ်မှု
သြဇာအာဏာ လုံးဝသက်ရောက်ခြင်း မရှိသည့် UWSA ထိန်းချုပ်ရာ “၀” ဒေသ ၊
NDAA မိုင်းလား အဖွဲ့အုပ်ချုပ်ရာ မိုင်းလားဒေသတို့လည်း ရှမ်းပြည်နယ်တွင်
တည်ရှိနေသည်။
သတင်း - စိုင်းထွန်းအောင်လွင်
Photo - သျှမ်းသံတော်ဆင့်
The Ladies News Journal