“ကာတာ စင်တာရဲ့ ထောက်ပြချက် မှန်သလား” ဧပြီ ၃

ပြီးခဲ့တဲ့ ရက်ပိုင်းက အမေရိကန် အခြေစိုက် ကာတာစင်တာ Carter Center ဟာ မြန်မာနိုင်ငံ ရွေးကောက်ပွဲနဲ့ ပတ်သက်တဲ့ အစီရင်ခံစာ တစ်စောင် ထုတ်ပြန်လိုက်ပါတယ်။ အဲဒီ အစီရင်ခံစာထဲမှာ ပြည်ထောင်စု ရွေးကောက်ပွဲ ကော်မရှင်အနေနဲ့ တကယ့်ကို ကြားနေပြီး ဘက်မလိုက်တဲ့ အဖွဲ့တစ်ခုအဖြစ် ဖော်ပြနိုင်ဖို့ ကိစ္စ၊ ၂၀၁၀ တုန်းက အကြီးအကျယ် ဖြစ်ပွားခဲ့တဲ့ ကြိုတင်မဲတွေ ပြဿနာ၊ ရွေးကောက်ပွဲကို အကြောင်းပြုပြီး ဘာသာရေး လူမျိုးရေး ဆန်တဲ့ ပဋိပက္ခတွေ ထပ်မံ ဖြစ်ပွားလာမှာကို စိုးရိမ်ပူပန်တဲ့ကိစ္စ စတာတွေကို ထောက်ပြခဲ့ပါတယ်။ ကာတာစင်တာ အစီရင်ခံစာမှာ ဘာတွေ ထောက်ပြခဲ့ပါသလဲ။ အဲဒီ ထောက်ပြချက်တွေဟာ လက်တွေ့အခြေအနေနဲ့ နီးစပ်ပါသလား။ ရွေးကောက်ပွဲနဲ့ ပတ်သက်လို့

အခြား ဘာပြဿနာတွေ ရှိနိုင်သေးလဲဆိုတာ ဒီကနေ့ ဆွေးနွေးတင်ပြသွားပါ့မယ်။ အမေရိကန် သမ္မတ ဟောင်း ဂျင်မီကာတာ တည်ထောင်ထားတဲ့ ကာတာစင်တာဟာ ကမ္ဘာ့နိုင်ငံပေါင်း ၃၈ နိုင်ငံက ရွေးကောက်ပွဲပေါင်း ၁၀၀ နီးပါးကို စောင့်ကြည့်ခဲ့ဖူးတဲ့ အတွေ့အကြုံရှိပါတယ်။ မြန်မာနိုင်ငံနဲ့ ပတ်သက်ပြီးတော့လည်း ၂၀၁၄ ဒီဇင်ဘာကနေ ၂၀၁၅ ဖေဖေါ်ဝါရီလ အထိ ကရင်၊ ကယား၊ မွန်၊ ရှမ်းပြည်နယ်တွေနဲ့ ဧရာဝတီတိုင်း၊ မန္တလေးတိုင်းတွေကို သွားရောက် လေ့လာခဲ့ဖူးတဲ့ အဖွဲ့လည်း ဖြစ်ပါတယ်။ လက်ရှိ မြန်မာအစိုးရအနေနဲ့ နိုင်ငံတကာ က ရွေးကောက်ပွဲ လေ့လာစောင့်ကြည့်ရေး အဖွဲ့တွေကို ဖိတ်ခေါ်ထားပြီ ဖြစ်တဲ့အတွက် ကျင်းပပြီးခဲ့တဲ့ ၂၀၁၀ ရွေးကောက်ပွဲ၊ ၂၀၁၂ ရွေးကောက်ပွဲ တွေနဲ့ နှိုင်းယှဉ်ရင် သိသိသာသာ ခြားနားတဲ့ အကြောင်း၊ ဒါကို သူတို့ ထောက်ခံကြိုဆိုတယ် ဆိုတဲ့အကြောင်း ဖော်ပြထားပါတယ်။ ဒါပေမယ့်လည်း ပြည်ထောင်စု ရွေးကောက်ပွဲ ကော်မရှင် ဦးဆောင်သူဟာ အရင် စစ်ဗိုလ်ချုပ်ဟောင်း ဖြစ်နေတယ်၊ အောက်ခြေ ကော်မရှင် အဆင့်ဆင့် တာဝန်ရှိသူတွေဟာလည်း စစ်ဗိုလ်ဟောင်းတွေ ဖြစ်နေတဲ့အပြင် ဒေသဆိုင်ရာ အုပ်ချုပ်ရေး အဖွဲ့တွေကို မှီခိုနေရတဲ့အတွက် ဘက်မလိုက်ရေး မူအပေါ် ထိခိုက်နိုင်စရာ ရှိတယ်ဆိုပြီး ထောက်ပြထားပါတယ်။ ဒါတင်မက ကြိုတင် မဲပေးခိုင်းတဲ့ ကိစ္စမျိုးတွေဟာ နိုင်ငံတကာစံနဲ့စာရင် အလွန်ပဲ အားနည်းနေတယ်လို့ ထောက်ပြပါတယ်။ ဒါ့အပြင် white card လို့ခေါ်တဲ့ ယာယီသက်သေခံ လက်မှတ်သက်တမ်း ကုန်ဆုံးသွားပြီ ဖြစ်တဲ့အတွက် ဒီလက်မှတ်ကိုင်ဆောင်ခဲ့သူတွေ မဲပေးခွင့် ဆုံးရှုံးရမယ့် ကိစ္စကိုလည်း စိုးရိမ်မကင်း ဖြစ်တယ်လို့ ဆိုထားပါတယ်။ Carter Center ရောက်ရှိခဲ့တဲ့ နေရာတွေမှာ လူမျိုးရေး၊ ဘာသာရေး တင်းမာမှု စိုးရိမ်ဖွယ် ထူးထူးခြားခြား မတွေ့ခဲ့ရပေမဲ့ အစ္စလာမ် ဘာသာ ဆန့်ကျင်ရေး ရေးသားပြောဆိုမှုတွေ ပုံမှန်ရှိနေတယ်လို့ ဆိုပါတယ်။ ဒါကြောင့် လူမျိုးရေး တင်းမာမှုတွေ ပိုမို မဆိုးရွားနိုင်အောင် အားထုတ်သင့်တယ်လို့လည်း ထောက်ပြထား ပါတယ်။ ကာတာစင်တာရဲ့ ပထမဦးဆုံး ထောက်ပြချက်ဟာ ရွေးကောက်ပွဲ ကော်မရှင် အဆင့်ဆင့်ရဲ့ ဘက်လိုက်မှု မရှိပါဘူးဆိုတဲ့ အချက်ကို ပြသနိုင်ရေး စိုးရိမ်တယ်ဆိုတဲ့ အကြောင်းပါ။ တကယ်လည်း အဲဒီအချက် မှန်ကန်ပါတယ်။ လက်ရှိ ရွေးကောက်ပွဲမှာ အရင် တပ်မတော် အစိုးရခေတ်က ပြည်ခိုင်ဖြိုး အသင်းကို ဆက်ခံတဲ့၊ စစ်ဗိုလ်ချုပ်ဟောင်းတွေ ဦးဆောင်တဲ့ ပြည်ခိုင်ဖြိုးပါတီနဲ့ ဒေါ်အောင်ဆန်းစုကြည် ဦးဆောင်တဲ့ အင်န်အယ်လ်ဒီ အမျိုးသားဒီမိုကရေစီ အဖွဲ့ချုပ်တို့ဟာ အဓိက ယှဉ်ပြိုင်ဘက်တွေ ဖြစ်လာနိုင်ပါတယ်။ အဲလို အခြေအနေမျိုးမှာ သမ္မတ က ခန့်အပ်လိုက်တဲ့ ပြည်ထောင်စု ရွေးကောက်ပွဲ ကော်မရှင်ဥက္ကဌဟာ အရင် စစ်အာဏာရှင်ခေတ်က ထိပ်ပိုင်းခေါင်းဆောင် တာဝန်ယူခဲ့တဲ့ စစ်ဗိုလ်ချုပ်ဟောင်း တစ်ယောက် ဖြစ်နေတဲ့အပြင် အသင်းကို အသွင်ပြောင်းလိုက်တဲ့ ပြည်ခိုင်ဖြိုးပါတီရဲ့ ထိပ်ပိုင်း ခေါင်းဆောင် တာဝန်ယူခဲ့သူလည်း ဖြစ်ပါတယ်။ ဒါတင်မက ၂၀၁၀ ရွေးကောက်ပွဲမှာ ပြည်ခိုင်ဖြိုး ပါတီကနေ ရွေးကောက်ပွဲဝင်ပြီး အမတ်အဖြစ် ရွေးချယ်ခံရသူလည်း ဖြစ်ပါတယ်။ တကယ်တော့ ဒီလောက် မကပါဘူး။ တိုင်းနဲ့ ပြည်နယ်၊ ခရိုင်၊ မြို့နယ် ရွေးကောက်ပွဲ ကော်မရှင် အဆင့်ဆင့် တာဝန်ရှိသူတွေနဲ့ အဖွဲ့ဝင် အများစုဟာလည်း တပ်မတော်ကနေ ရွှေ့ပြောင်း နေရာချထားပေးတဲ့ စစ်ဗိုလ်ဟောင်းတွေ ချည်းပဲဖြစ်ပါတယ်။ ဒါနဲ့ ပတ်သက်လို့ အစိုးရနဲ့ ရွေးကောက်ပွဲ ကော်မရှင်ဘက်က အရပ်သားဝန်ထမ်းတွေ ရှာဖွေရ မလွယ်ကူလို့ တပ်မတော်သားတွေကို နေရာချထားပေးတာ ဆိုပြီး ဆင်ခြေပေးထားပါတယ်။ ဒါကြောင့် ဒီ ပြည်ထောင်စု ရွေးကောက်ပွဲကော်မရှင်နဲ့ ကော်မရှင် အဆင့်ဆင့်ဟာ လာမယ့် ရွေးကောက်ပွဲမှာ ဘက်မလိုက်ပါဘူး၊ ကြားနေပါ့မယ်ဆိုတာ ယုံကြည်သူ မရှိသလောက် နည်းနေပါတယ်။ ပုံရိပ်လည်း မကောင်းပါဘူး။ လတ်တလော သမ္မတ ဦးသိန်းစိန်ကတော့ ပြည်ထောင်စု ရွေးကောက်ပွဲ ကော်မရှင် အဖွဲ့ဝင်အဖြစ် နောက်ထပ်တိုင်းရင်းသား ရှစ်ယောက်ကို ထည့်သွင်းဖို့ အဆိုပြုထားပါတယ်။ ဒါပေမယ့်လည်း ဒီလောက် လုပ်ပြရုံနဲ့ ရွေးကောက်ပွဲကော်မရှင် အဆင့်ဆင့်ရဲ့ ဘက်မလိုက်ပါဘူးဆိုတဲ့ ပုံရိပ် ပိုကောင်းလာမှာတော့ မဟုတ်သေးပါဘူး။ ကာတာ စင်တာက နောက်ထပ် ထောက်ပြတာကတော့ ကြိုတင်မဲ ကိစ္စပါ။ ၂၀၁၀ ရွေးကောက်ပွဲတုန်းမှာ မသမာမှု ကျယ်ကျယ်ပြန့်ပြန့် ဖြစ်ပေါ်ခဲ့တဲ့ ပြဿနာအဖြစ် ပြည်သူတွေ နားလည်ထားကြတာပါ။ ဒါနဲ့ ပတ်သက်ပြီးတော့ ဥပဒေနဲ့ အညီ ကောင်းအောင် လုပ်ပါမယ်လို့ တော့ ရွေးကောက်ပွဲကော်မရှင်က ကတိပြုထားပြီးပါပြီ။ နောက်တစ်ခုကတော့ ရွေးကောက်ပွဲကို အကြောင်းပြုပြီး ဘာသာရေး လူမျိုးရေးဆန်တဲ့ ပဋိပက္ခတွေ ဖြစ်ပွားလာမှာကိုပါ။ ကာတာ စင်တာက စိုးရိမ်မယ် ဆိုလည်း စိုးရိမ်လောက်စရာ အခြေအနေပါ။ ဒါနဲ့ ပတ်သက်ပြီး လတ်တလော ဥပမာတစ်ခု ထောက်ပြလို့ရပါတယ်။ ပြီးခဲ့တဲ့ မတ်လ ကုန်က ပုဇွန်တောင်မြို့နယ်ထဲမှာ ဗုဒ္ဓဘာသာ တရားပွဲတစ်ခု ကျင်းပပါ တယ်။ တရားပွဲ တစ်ရက်မှာ တိပိဋက အောင် ဆရာတော်တစ်ပါး တရားဟောပါတယ်။ ဆရာတော်ရဲ့ ဟောကြားချက်ထဲမှာ လွတ်လပ်ရေးရဖို့ ကြီးပမ်းစဉ်ကာလ အတွင်းက အမျိုးသား ခေါင်းဆောင် ဗိုလ်ချုပ်အောင်ဆန်းက တိုင်းပြုပြည်ပြု လွှတ်တော်အမတ် လုပ်မယ့်သူတွေရဲ့ အရည်အချင်းမှာ ကိုယ့်အမျိုးဘာသာကို စောင့်ရှောက်မယ့် ဝံသာနုနဲ့ ပြည့်စုံသူ ဖြစ်ရမယ်ဆိုတဲ့ အချက် ထည့်သွင်းထားကြောင်း၊ ဒါဟာ အဲဒီ အချိန်တုန်းက ဗုဒ္ဓဘာသာဝင် ၁၂ ယောက်မှာ အန္တရာယ်ပေးနိုင်မယ့် ပုဂ္ဂိုလ် တစ်ယောက်နှုန်းရှိတဲ့ အခြေအနေမျိုးဖြစ်ပြီး နောင် လွတ်လပ်ရေးရပြီး အနှစ် ၅၀ ကြာလာရင် ငါးယောက် တစ်ယောက်နှုန်း ဖြစ်သွားမယ်လို့ ဗိုလ်ချုပ်အောင်ဆန်းက ပြောပြီး ထည့်သွင်းခဲ့တဲ့အကြောင်း၊ ဒီအချက်ကြောင့်ပဲ ၁၉၉၀ ရွေးကောက်ပွဲမှာ ဒေါ်အောင်ဆန်းစုကြည်ဟာ အမတ်လောင်း ဖြစ်ခွင့်မရတဲ့အကြောင်း ဟောပြောခဲ့ပါတယ်။ ဒါတင်မက မြန်မာနိုင်ငံမှာ ဗိုလ်ချုပ်အောင်ဆန်း ပြောခဲ့သလိုပဲ လွတ်လပ်ရေးရပြီး နှစ်ပေါင်း ၅၀ အတွင်း ဗုဒ္ဓဘာသာဝင် ငါးယောက်မှာ အန္တရာယ်ပေးနိုင်သူ တစ်ယောက်နှုန်းထား ဖြစ်လာကြောင်း၊ လက်ရှိ အဲဒီ အန္တရာယ်ပေးနိုင်သူ ၂၃ ရာခိုင်နှုန်း ရှိလာပြီး အမျိုးဘာသာ ထိန်းသိမ်းစောင့်ရှောက်တာ မလုပ်ရင် ၃၀ ရာခိုင်နှုန်း၊ သုံးယောက် တစ်ယောက်နှုန်း ဖြစ်လာမှာ ဖြစ်ပြီး “အစ္စလာမ်မစ် တိုင်းပြည် ဖြစ်ဖို့သာ ပြင်ပေတော့။ ခေါင်းဖြတ်ခံရဖို့သာ ပြင်ပေတော့” ဆိုပြီး ဟောပြောခဲ့ပါတယ်။ မမှန်ကန်တဲ့ အချက်အလက်တွေနဲ့ ဘာသာခြား မုန်းတီးရေးကို ပေါ်ပေါ်တင်တင် လှုံ့ဆော်တာ တွေ့နိုင်ပါတယ်။ ဒီလို အချက်တွေကြောင့်လည်း ကာတာ စင်တာက စိုးရိမ်ပူပန်ပြီး အစီရင်ခံစာမှာ ထောက်ပြခဲ့တာ ဖြစ်နိုင်ပါတယ်။ အစီရင်ခံစာမှာ ပါသလိုပဲ၊ ကာတာစင်တာဟာ အစိုးရနဲ့ ရွေးကောက်ပွဲကော်မရှင်ကို ဖိအားပေးတာ၊ တောင်းဆိုတာမျိုး ဘာမှ မလုပ်ပါဘူး။ သူတို့ တွေ့ရှိချက်ကို ထောက်ပြတာ ဖြစ်ပြီး နိုင်ငံတကာက လက်ခံနိုင်တဲ့ တရားမျှတ လွတ်လပ်တဲ့ ရွေးကောက်ပွဲ ကျင်းပချင်တယ် ဆိုရင် အစိုးရနဲ့ ကော်မရှင် ဘက်က လေးလေးနက်နက် သုံးသပ်ပြုပြင်သင့်ပါကြောင်း တင်ပြလိုက်ရ ပါတယ်။